aag ke sath main bahta hua pani sunna

aag ke saath maiñ bahtā huā paanī sunñā

rāt-bhar apne anāsir kī sunānī sunñā

dekhnā roz añdheroñ meñ shuāoñ kī numū

pattharoñ meñ kisī dariyā kī ravānī sunñā

vo suna.eñgī kabhī merī kahānī tum ko

tum havāoñ se kabhī merī kahānī sunñā

merī ḳhāmoshī mirī mashq hai is mashq meñ tum

maar kar tiir mirī tishna-dahānī sunñā

umr nā-kāfī hai is hijrat-e-avval ke liye

phir janam luuñ to mirī hijrat-e-sānī sunñā

kam-sinī par hai ajab haal tumhārā yaaro

sun lo āsān nahīñ us kī javānī sunñā

giit mere jo pasand aate haiñ itne tum ko

inhīñ gītoñ kī kabhī marsiya-ḳhvānī sunñā

kyā nayā tum ko sunā.ūñ ki nayā kuchh bhī nahīñ

na.e lafzoñ meñ vahī baat purānī sunñā

aag ke sath main bahta hua pani sunna

raat-bhar apne anasir ki sunani sunna

dekhna roz andheron mein shuaon ki numu

pattharon mein kisi dariya ki rawani sunna

wo sunaengi kabhi meri kahani tum ko

tum hawaon se kabhi meri kahani sunna

meri KHamoshi meri mashq hai is mashq mein tum

mar kar tir meri tishna-dahani sunna

umr na-kafi hai is hijrat-e-awwal ke liye

phir janam lun to meri hijrat-e-sani sunna

kam-sini par hai ajab haal tumhaara yaro

sun lo aasan nahin us ki jawani sunna

git mere jo pasand aate hain itne tum ko

inhin giton ki kabhi marsiya-KHwani sunna

kya naya tum ko sunaun ki naya kuchh bhi nahin

nae lafzon mein wahi baat purani sunna