aahon se mere ghar mein hawa garm rahegi

aahoñ se mire ghar meñ havā garm rahegī

maiñ jā.ūñgā to bhī mirī jā garm rahegī

bharte hī raheñge nafas-e-sard hazāroñ

jab tak ki tarī ān-o-adā garm rahegī

jalnā mire tab dil kā lagegā ye Thikāne

sohbat tarī jab mujh se sadā garm rahegī

choTī meñ dil-soḳhta ko gūñdh ke pyāre

mat phek qifā par ki qifā garm rahegī

bulbul na mujhe dījiyo to naale kī taklīf

varna asar is ke se sabā garm rahegī

jab tak nahiñ to duḳhtar-e-raz hī ko rakhūñgā

kuchh to ye baġhal merī bhalā garm rahegī

ushshāq ko tarġhīb-e-mohabbat hī karegā

jab tak hai 'hasan' bazm-e-vafā garm rahegī

aahon se mere ghar mein hawa garm rahegi

main jaunga to bhi meri ja garm rahegi

bharte hi rahenge nafas-e-sard hazaron

jab tak ki tari aan-o-ada garm rahegi

jalna mere tab dil ka lagega ye Thikane

sohbat tari jab mujh se sada garm rahegi

choTi mein dil-soKHta ko gundh ke pyare

mat phek qifa par ki qifa garm rahegi

bulbul na mujhe dijiyo to nale ki taklif

warna asar is ke se saba garm rahegi

jab tak nahin to duKHtar-e-raz hi ko rakhunga

kuchh to ye baghal meri bhala garm rahegi

ushshaq ko targhib-e-mohabbat hi karega

jab tak hai 'hasan' bazm-e-wafa garm rahegi