aaine kahte hain is KHwab ko ruswa na karo

aa.ine kahte haiñ is ḳhvāb ko rusvā na karo

aise kho.e hue andāz se dekhā na karo

kaise aa jaatī hai koñpal pe ye jaadū kī lakīr

din guzar jaate haiñ mahsūs karo yā na karo

kahīñ dīvār-e-qayāmat kabhī zanjīr-e-azal

kyā karo ishq-e-ziyāñ-e-kesh meñ aur kyā na karo

bhāgte jaao kisī samt kisī saa.e se

tazkira ek hai afsāna-dar-afsāna karo

phir koī taaza gharauñdā kisī vīrāne meñ

gaañv ko shahr karo shahr ko vīrāna karo

bazm-e-imkāñ huī do ghūñT lahū āñkhoñ meñ

hirs kahtī hai ki kaunain ko paimāna karo

kyuuñ na ho mujh se shikāyat tumhīñ tum vo ho ki phir

use jiitā bhī na chhoḌo jise dīvāna karo

ek hī raat sahī phuul to khulte haiñ 'ḳhizāñ'

maut meñ kyā hai ki jiine kī tamannā na karo

aaine kahte hain is KHwab ko ruswa na karo

aise khoe hue andaz se dekha na karo

kaise aa jati hai konpal pe ye jadu ki lakir

din guzar jate hain mahsus karo ya na karo

kahin diwar-e-qayamat kabhi zanjir-e-azal

kya karo ishq-e-ziyan-e-kesh mein aur kya na karo

bhagte jao kisi samt kisi sae se

tazkira ek hai afsana-dar-afsana karo

phir koi taza gharaunda kisi virane mein

ganw ko shahr karo shahr ko virana karo

bazm-e-imkan hui do ghunT lahu aankhon mein

hirs kahti hai ki kaunain ko paimana karo

kyun na ho mujh se shikayat tumhin tum wo ho ki phir

use jita bhi na chhoDo jise diwana karo

ek hi raat sahi phul to khulte hain 'KHizan'

maut mein kya hai ki jine ki tamanna na karo