aaj bhi jis ki KHushbu se hai matwali matwali raat

aaj bhī jis kī ḳhushbū se hai matvālī matvālī raat

vo tire jalte pahlū meñ thī jaan nikālne vaalī raat

sub.h se tanhā tanhā phirnā phir aa.egī savālī raat

aur tire paas dharā hī kyā hai ai mirī ḳhālī ḳhālī raat

dil par barf kī sil rakh denā nāgan ban kar Das lenā

apne liye donoñ hī barābar kaalī ho ki ujālī raat

piile patte sūkhī shāḳhoñ par bhī to aksar chamkā chāñd

mujh se milne kabhī na aa.ī terī naaz kī paalī raat

dekh liye āñkhoñ ne merī taaza shabnam baasī phuul

garche sub.h ko merī ḳhātir tum ne mujh se chhupā lī raat

tum is ko sonā kahte ho tum kyā ham bhī kahte haiñ

apnī thakī palkoñ par ham ne lamha bhar jo sambhālī raat

aane vaalī aa nahīñ chuktī jaane vaalī jā bhī chukī

vaise to har jaane vaalī raat thī aane vaalī raat

aaj bhi jis ki KHushbu se hai matwali matwali raat

wo tere jalte pahlu mein thi jaan nikalne wali raat

subh se tanha tanha phirna phir aaegi sawali raat

aur tere pas dhara hi kya hai ai meri KHali KHali raat

dil par barf ki sil rakh dena nagan ban kar Das lena

apne liye donon hi barabar kali ho ki ujali raat

pile patte sukhi shaKHon par bhi to aksar chamka chand

mujh se milne kabhi na aai teri naz ki pali raat

dekh liye aankhon ne meri taza shabnam basi phul

garche subh ko meri KHatir tum ne mujh se chhupa li raat

tum is ko sona kahte ho tum kya hum bhi kahte hain

apni thaki palkon par hum ne lamha bhar jo sambhaali raat

aane wali aa nahin chukti jaane wali ja bhi chuki

waise to har jaane wali raat thi aane wali raat