aaKHir KHud apne hi lahu mein Dub ke sarf-e-wigha hoge

āḳhir ḳhud apne hī lahū meñ Duub ke sarf-e-viġhā hoge

qadam qadam par jañg laḌī hai kahāñ kahāñ barpā hoge

haal kā lamha patthar Thahrā yuuñ bhī kahāñ guzartā hai

haath milā kar jaane vaalo dil se kahāñ judā hoge

maujoñ par lahrāte tinko chalo na yuuñ itrā ke chalo

aur zarā ye dariyā utrā tum bhī lab-e-dariyā hoge

socho khoj milā hai kis ko raah badalte tāroñ kā

is vahshat meñ chalte chalte aap sitāra sā hoge

siine par jab harf-e-tamannā dard kī sūrat utregā

ḳhudī aañkh se Tapkoge aur ḳhud hī dast-e-duā hoge

sūkhe peḌoñ kī sab lāsheñ ġharq kaf-e-sailāb meñ haiñ

qaht-e-āb se marte logo bolo ab kyā chāhoge

baat ye hai is baaġh meñ phuul se pattā honā achchhā hai

rañg aur ḳhushbū bāñToge to pahle rizq-e-havā hoge

ai mere nā-gufta shero ye to batāo mere ba.ad

kaun se dil meñ qarār karoge kis ke lab se adā hoge

aaKHir KHud apne hi lahu mein Dub ke sarf-e-wigha hoge

qadam qadam par jang laDi hai kahan kahan barpa hoge

haal ka lamha patthar Thahra yun bhi kahan guzarta hai

hath mila kar jaane walo dil se kahan juda hoge

maujon par lahraate tinko chalo na yun itra ke chalo

aur zara ye dariya utra tum bhi lab-e-dariya hoge

socho khoj mila hai kis ko rah badalte taron ka

is wahshat mein chalte chalte aap sitara sa hoge

sine par jab harf-e-tamanna dard ki surat utrega

KHudi aankh se Tapkoge aur KHud hi dast-e-dua hoge

sukhe peDon ki sab lashen gharq kaf-e-sailab mein hain

qaht-e-ab se marte logo bolo ab kya chahoge

baat ye hai is bagh mein phul se patta hona achchha hai

rang aur KHushbu banToge to pahle rizq-e-hawa hoge

ai mere na-gufta shero ye to batao mere baad

kaun se dil mein qarar karoge kis ke lab se ada hoge