aalam-e-KHwab sahi KHwab mein chalte rahiye

ālam-e-ḳhvāb sahī ḳhvāb meñ chalte rahiye

raat kaT jā.egī karvaT to badalte rahiye

kis ko mālūm kahāñ se koī patthar aa jaa.e

hausla ho to añdheroñ meñ nikalte rahiye

ban hī jā.egā kabhī koī ḳhudī kā paikar

apne ehsās kī garmī se pighalte rahiye

zindagī silsila-e-ḳhvāb-e-tamannā hai koī

raat bhar ḳhvāb ko ḳhvāboñ se badalte rahiye

ham pe kyā hogā zamāne kī havāoñ kā asar

aap mausam kī tarah roz badalte rahiye

zindagī kyā hai sarāboñ kā safar hai 'ābid'

vaqt kī ret pe din raat machalte rahiye

aalam-e-KHwab sahi KHwab mein chalte rahiye

raat kaT jaegi karwaT to badalte rahiye

kis ko malum kahan se koi patthar aa jae

hausla ho to andheron mein nikalte rahiye

ban hi jaega kabhi koi KHudi ka paikar

apne ehsas ki garmi se pighalte rahiye

zindagi silsila-e-KHwab-e-tamanna hai koi

raat bhar KHwab ko KHwabon se badalte rahiye

hum pe kya hoga zamane ki hawaon ka asar

aap mausam ki tarah roz badalte rahiye

zindagi kya hai sarabon ka safar hai 'abid'

waqt ki ret pe din raat machalte rahiye