aankh ho aur koi KHwab na ho

aañkh ho aur koī ḳhvāb na ho

nāzil aisā kahīñ azaab na ho

kuchh to mahfūz rakhiye siine meñ

zindagānī khulī kitāb na ho

sarf kiije na is qadar ḳhud ko

laakh chāho to phir hisāb na ho

is liye kāTtā huuñ ye ghaḌiyāñ

vaqt kī chaal kāmyāb na ho

guuñj kaisī hai kohsāroñ meñ

ye kisī chīḳh kā javāb na ho

kyā chamaktā hai tapte sahrā meñ

dekh chhū kar kahīñ ye aab na ho

ye jalan piiTh meñ hai kyuuñ 'fārūq'

pusht par terī āftāb na ho

aankh ho aur koi KHwab na ho

nazil aisa kahin azab na ho

kuchh to mahfuz rakhiye sine mein

zindagani khuli kitab na ho

sarf kije na is qadar KHud ko

lakh chaho to phir hisab na ho

is liye kaTta hun ye ghaDiyan

waqt ki chaal kaamyab na ho

gunj kaisi hai kohsaron mein

ye kisi chiKH ka jawab na ho

kya chamakta hai tapte sahra mein

dekh chhu kar kahin ye aab na ho

ye jalan piTh mein hai kyun 'faruq'

pusht par teri aaftab na ho