aankh kuchh be-sabab hi nam to nahin

aañkh kuchh be-sabab hī nam to nahīñ

ye kahīñ aap kā karam to nahīñ

ham ne maanā ki raushnī kam hai

phir bhī ye sub.h shām-e-ġham to nahīñ

ishq meñ bandisheñ hazār sahī

bandish-e-dāna-o-diram to nahīñ

thā kahāñ ishq ko salīqa-e-ġham

vo nazar mā.il-e-karam to nahīñ

monis-e-shab rafīq-e-tanhā.ī

dard-e-dil bhī kisī se kam to nahīñ

vo kahāñ aur kahāñ sitamgārī

kuchh bhī kahte hoñ log ham to nahīñ

shikve kī baat aur hai varna

lutf-e-paiham koī sitam to nahīñ

dekh ai qissa-go-e-rañj-e-firāq

nok-e-mizhgān-e-yār nam to nahīñ

un ke dil se savāl kartā hai

ye tabassum sharīk-e-ġham to nahīñ

aankh kuchh be-sabab hi nam to nahin

ye kahin aap ka karam to nahin

hum ne mana ki raushni kam hai

phir bhi ye subh sham-e-gham to nahin

ishq mein bandishen hazar sahi

bandish-e-dana-o-diram to nahin

tha kahan ishq ko saliqa-e-gham

wo nazar mail-e-karam to nahin

monis-e-shab rafiq-e-tanhai

dard-e-dil bhi kisi se kam to nahin

wo kahan aur kahan sitamgari

kuchh bhi kahte hon log hum to nahin

shikwe ki baat aur hai warna

lutf-e-paiham koi sitam to nahin

dekh ai qissa-go-e-ranj-e-firaq

nok-e-mizhgan-e-yar nam to nahin

un ke dil se sawal karta hai

ye tabassum sharik-e-gham to nahin