aankh mein aansu hain ehsas-e-masarrat dil mein hai

aañkh meñ aañsū haiñ ehsās-e-masarrat dil meñ hai

ek firdaus-e-nazāra aap kī mahfil meñ hai

har jafā terī munāsib har sitam terā durust

ab vahī merī tamannā hai jo tere dil meñ hai

jab ba-juz mahbūb ho jaatī hai ojhal kā.enāt

ik maqām aisā bhī jazb-e-shauq kī manzil meñ hai

fasl-e-gul meñ be-tahāshā hañsne vaalo hoshiyār

iztirāb-e-dil kā pahlū bhī sukūn-e-dil meñ hai

jis ko duurī se huzūrī meñ sivā ho iztirāb

vo pareshān-e-mohabbat kis qadar mushkil meñ hai

dahr ke hañgāma-e-shaiḳh-o-barahman se buland

aur bhī hañgāma ik girdāb-e-nūh-e-dil meñ hai

ab koī shāyān-e-jalva hai na shāyān-e-kalām

tū usī manzil meñ behtar hai ki jis manzil meñ hai

nā-sazā hai is ke jalvoñ kī nazākat ke liye

vo ġham-e-hāsil jo tere ishq ke hāsil meñ hai

maiñ to ḳhud uThne ko huuñ badlo na andāz-e-nazar

tum jo kahte hichkichāte ho vo mere dil meñ hai

apne markaz se sitāroñ par jo kartā huuñ nazar

jis ko jis manzil meñ chhoḌā thā usī manzil meñ hai

mom kar detī hai jo faulād-o-āhan kā jigar

vo bhī ik jhankār āvāz-e-shikast-e-dil meñ hai

kaun hai 'ehsān' merī zindagī kā rāzdār

kyā kahūñ kis tarah marne kī tamannā dil meñ hai

aankh mein aansu hain ehsas-e-masarrat dil mein hai

ek firdaus-e-nazara aap ki mahfil mein hai

har jafa teri munasib har sitam tera durust

ab wahi meri tamanna hai jo tere dil mein hai

jab ba-juz mahbub ho jati hai ojhal kaenat

ek maqam aisa bhi jazb-e-shauq ki manzil mein hai

fasl-e-gul mein be-tahasha hansne walo hoshiyar

iztirab-e-dil ka pahlu bhi sukun-e-dil mein hai

jis ko duri se huzuri mein siwa ho iztirab

wo pareshan-e-mohabbat kis qadar mushkil mein hai

dahr ke hangama-e-shaiKH-o-barahman se buland

aur bhi hangama ek girdab-e-nuh-e-dil mein hai

ab koi shayan-e-jalwa hai na shayan-e-kalam

tu usi manzil mein behtar hai ki jis manzil mein hai

na-saza hai is ke jalwon ki nazakat ke liye

wo gham-e-hasil jo tere ishq ke hasil mein hai

main to KHud uThne ko hun badlo na andaz-e-nazar

tum jo kahte hichkichate ho wo mere dil mein hai

apne markaz se sitaron par jo karta hun nazar

jis ko jis manzil mein chhoDa tha usi manzil mein hai

mom kar deti hai jo faulad-o-ahan ka jigar

wo bhi ek jhankar aawaz-e-shikast-e-dil mein hai

kaun hai 'ehsan' meri zindagi ka raazdar

kya kahun kis tarah marne ki tamanna dil mein hai