aankhen KHuda ne baKHshi hain rone ke waste

āñkheñ ḳhudā ne baḳhshī haiñ rone ke vāste

do kashtiyāñ milī haiñ Dubone ke vāste

uryāñ chalūñ maiñ qabr meñ sone ke vāste

kaafī hai mujh ko post bichhaune ke vāste

kushtoñ ke khet meñ jo huzūr aaj hañs paḌe

motī ke daane mil ga.e bone ke vāste

niiñd uḌ ga.ī hai rañg-e-talā.ī kī yaad meñ

pāras kā surma chāhiye sone ke vāste

afsūñ se sāmrī ko jalāte haiñ vasl meñ

jaadū jagā rahe haiñ vo Tone ke vāste

taḌpā maiñ ḳhaak par to kiyā charḳh ne karam

bijlī girā.ī mere bichhaune ke vāste

ḳhvābīdgān-e-ḳhāk haiñ giryāñ mazār par

sotoñ kī āñkheñ khul ga.iiñ rone ke vāste

ye ghul ke mar gayā huuñ ki merā kafan tamām

jaalā banā hai qabr ke kone ke vāste

jiinā hai sab ko maut hai tasvīr kī tarah

naqshe jame hue haiñ na hone ke vāste

sañgīñ dilī se champa.ī rañgoñ kī hai chamak

sañg-e-mahak zarūr hai sone ke vāste

goyā zabān huuñ dahan-e-rozgār meñ

kyā kyā maze mile mujhe khone ke vāste

naqsh-e-nagīn-e-mohr mirā naqsh-e-āb hai

paidā huā huuñ naam Dubone ke vāste

dāñtoñ ke ishq meñ hai ye iġhrāq-e-lāġharī

dauḌā huuñ motiyoñ ke pirone ke vāste

chakkī lagī hai bosa-e-husn malīh kī

zaḳhmoñ ke muñh khulī haiñ salone ke vāste

mailā hai farsh par to mah-e-āj mai-kasho

laao sharāb chāñdnī dhone ke vāste

shāyad kareñge chashma-e-ḳhurshīd meñ vo ġhusl

shabnam chalī hai paanī samone ke vāste

us husn-e-pur-namak meñ ajab hai numūd-e-ḳhat

dekhā hujūm-e-mor salone ke vāste

qārūñ kā bhī ḳhazāna luTā dījiye 'munīr'

mumsik kā maal lūTiye khone ke vāste

aankhen KHuda ne baKHshi hain rone ke waste

do kashtiyan mili hain Dubone ke waste

uryan chalun main qabr mein sone ke waste

kafi hai mujh ko post bichhaune ke waste

kushton ke khet mein jo huzur aaj hans paDe

moti ke dane mil gae bone ke waste

nind uD gai hai rang-e-talai ki yaad mein

paras ka surma chahiye sone ke waste

afsun se samri ko jalate hain wasl mein

jadu jaga rahe hain wo Tone ke waste

taDpa main KHak par to kiya charKH ne karam

bijli girai mere bichhaune ke waste

KHwabidgan-e-KHak hain giryan mazar par

soton ki aankhen khul gain rone ke waste

ye ghul ke mar gaya hun ki mera kafan tamam

jala bana hai qabr ke kone ke waste

jina hai sab ko maut hai taswir ki tarah

naqshe jame hue hain na hone ke waste

sangin dili se champai rangon ki hai chamak

sang-e-mahak zarur hai sone ke waste

goya zaban hun dahan-e-rozgar mein

kya kya maze mile mujhe khone ke waste

naqsh-e-nagin-e-mohr mera naqsh-e-ab hai

paida hua hun nam Dubone ke waste

danton ke ishq mein hai ye ighraq-e-laghari

dauDa hun motiyon ke pirone ke waste

chakki lagi hai bosa-e-husn malih ki

zaKHmon ke munh khuli hain salone ke waste

maila hai farsh par to mah-e-aj mai-kasho

lao sharab chandni dhone ke waste

shayad karenge chashma-e-KHurshid mein wo ghusl

shabnam chali hai pani samone ke waste

us husn-e-pur-namak mein ajab hai numud-e-KHat

dekha hujum-e-mor salone ke waste

qarun ka bhi KHazana luTa dijiye 'munir'

mumsik ka mal luTiye khone ke waste