aap hain be-gunah kya kahna

aap haiñ be-gunāh kyā kahnā

kyā safā.ī hai vaah kyā kahnā

us se hāl-e-tabāh kyā kahnā

jo kahe sun ke vaah kyā kahnā

hashr meñ ye unheñ na.ī sūjhī

ban ga.e dād-ḳhvāh kyā kahnā

'uzr karnā sitam ke baad tumheñ

ḳhuub aatā hai vaah kyā kahnā

tum na roko nigāh ko apnī

ham kareñ zabt-e-āh kyā kahnā

tujh se achchhe kahāñ zamāne meñ

vaah ai rashk-e-māh kyā kahnā

ġhair par lutf-e-ḳhās kā iz.hār

mujh se TeḌhī nigāh kyā kahnā

ġhair se maañg kar subūt-e-vafā

ban ga.e ḳhud gavāh kyā kahnā

dil bhī le kar nahīñ yaqīn-e-vafā

hai abhī ishtibāh kyā kahnā

balbe chitvan tirī ma.āz-allāh

uf re TeḌhī nigāh kyā kahnā

un gunoñ par najāt kī ummīd

'be-ḳhud'-e-rū-siyāh kyā kahnā

aap hain be-gunah kya kahna

kya safai hai wah kya kahna

us se haal-e-tabah kya kahna

jo kahe sun ke wah kya kahna

hashr mein ye unhen nai sujhi

ban gae dad-KHwah kya kahna

'uzr karna sitam ke baad tumhein

KHub aata hai wah kya kahna

tum na roko nigah ko apni

hum karen zabt-e-ah kya kahna

tujh se achchhe kahan zamane mein

wah ai rashk-e-mah kya kahna

ghair par lutf-e-KHas ka izhaar

mujh se TeDhi nigah kya kahna

ghair se mang kar subut-e-wafa

ban gae KHud gawah kya kahna

dil bhi le kar nahin yaqin-e-wafa

hai abhi ishtibah kya kahna

balbe chitwan teri maaz-allah

uf re TeDhi nigah kya kahna

un gunon par najat ki ummid

'be-KHud'-e-ru-siyah kya kahna