aap ka etibar karta hun

aap kā e'tibār kartā huuñ

ye ḳhatā baar baar kartā huuñ

be-ta.alluq sā ik ta.alluq hai

jis ta.alluq ko pyaar kartā huuñ

ham haiñ aur justujū-e-manzil hai

muddatoñ intizār kartā huuñ

kārvāñ zindagī kā guzrā hai

intizār-e-ġhubār kartā huuñ

maut nā-mo'tabar sī lagtī hai

umr kā e'tibār kartā huuñ

baat jab hai ki sharm rah jaa.e

tauba yuuñ to hazār kartā huuñ

apne par iḳhtiyār hai sab ko

yaad be-iḳhtiyār kartā huuñ

laġhzisheñ zindagī kī mat pūchho

pahroñ baiThā shumār kartā huuñ

juz nadāmat ke kuchh nahīñ miltā

nazreñ jab ḳhud se chaar kartā huuñ

merā apnā hī saaya hai 'ashraf'

jaan jis par nisār kartā huuñ

aap ka e'tibar karta hun

ye KHata bar bar karta hun

be-talluq sa ek talluq hai

jis talluq ko pyar karta hun

hum hain aur justuju-e-manzil hai

muddaton intizar karta hun

karwan zindagi ka guzra hai

intizar-e-ghubar karta hun

maut na-mo'tabar si lagti hai

umr ka e'tibar karta hun

baat jab hai ki sharm rah jae

tauba yun to hazar karta hun

apne par iKHtiyar hai sab ko

yaad be-iKHtiyar karta hun

laghzishen zindagi ki mat puchho

pahron baiTha shumar karta hun

juz nadamat ke kuchh nahin milta

nazren jab KHud se chaar karta hun

mera apna hi saya hai 'ashraf'

jaan jis par nisar karta hun