aaraish-e-bahaar ka saman kahan se aae

ārā.ish-e-bahār kā sāmāñ kahāñ se aa.e

yā'nī junūñ meñ roz garebāñ kahāñ se aa.e

insāñ mile to daulat-e-kaunain bhī nisār

lekin savāl ye hai ki insāñ kahāñ se aa.e

josh-e-junūñ ba-ḳhair ab is ġham se chhuT ga.e

dāman kahāñ se aa.e garebāñ kahāñ se aa.e

bach-bach ke laakh bād-e-bahārāñ chale magar

un kī sī vo adā-e-gurezāñ kahāñ se aa.e

itnā bhī koī pūchhne vaalā nahīñ 'ra.īs'

hairāñ kahāñ se aa.e pareshāñ kahāñ se aa.e

aaraish-e-bahaar ka saman kahan se aae

ya'ni junun mein roz gareban kahan se aae

insan mile to daulat-e-kaunain bhi nisar

lekin sawal ye hai ki insan kahan se aae

josh-e-junun ba-KHair ab is gham se chhuT gae

daman kahan se aae gareban kahan se aae

bach-bach ke lakh baad-e-bahaaran chale magar

un ki si wo ada-e-gurezan kahan se aae

itna bhi koi puchhne wala nahin 'rais'

hairan kahan se aae pareshan kahan se aae