ārām ke the sāthī kyā kyā jab vaqt paḌā to koī nahīñ
sab dost haiñ apne matlab ke duniyā meñ kisī kā koī nahīñ
gul-gasht meñ dāman muñh pe na lo nargis se hayā kyā hai tum ko
us aañkh se parda karte ho jis aañkh meñ pardā koī nahīñ
jo baaġh thā kal phūloñ se bharā aTkheliyoñ se chaltī thī sabā
ab sumbul o gul kā zikr to kyā ḳhaak uḌtī hai us jā koī nahīñ
kal jin ko añdhere se thā hazar rahtā thā charāġhāñ pesh-e-nazar
ik sham.a jalā de turbat par juz daaġh ab itnā koī nahīñ
jab band huiiñ āñkheñ to khulā do roz kā thā saarā jhagḌā
taḳht us kā na ab hai taaj us kā askandar o daarā koī nahīñ
qattāl-e-jahāñ māshūq jo the suune paḌe haiñ marqad un ke
yā marne vaale lākhoñ the yā rone vaalā koī nahīñ
ai 'ārzū' ab tak itnā patā chaltā hai tirī barbādī kā
jis se na bagūle hoñ paidā is tarah kā sahrā koī nahīñ
aaram ke the sathi kya kya jab waqt paDa to koi nahin
sab dost hain apne matlab ke duniya mein kisi ka koi nahin
gul-gasht mein daman munh pe na lo nargis se haya kya hai tum ko
us aankh se parda karte ho jis aankh mein parda koi nahin
jo bagh tha kal phulon se bhara aTkheliyon se chalti thi saba
ab sumbul o gul ka zikr to kya KHak uDti hai us ja koi nahin
kal jin ko andhere se tha hazar rahta tha charaghan pesh-e-nazar
ek shama jala de turbat par juz dagh ab itna koi nahin
jab band huin aankhen to khula do roz ka tha sara jhagDa
taKHt us ka na ab hai taj us ka askandar o dara koi nahin
qattal-e-jahan mashuq jo the sune paDe hain marqad un ke
ya marne wale lakhon the ya rone wala koi nahin
ai 'arzu' ab tak itna pata chalta hai teri barbaadi ka
jis se na bagule hon paida is tarah ka sahra koi nahin
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.