aarzuon ne uchhal-kud machai hui hai

ārzūoñ ne uchhal-kūd machā.ī huī hai

jab se tujh tak mirī chāhat kī rasā.ī huī hai

mujh se isrār hai dil kā ki banūñ sahrā.ī

ḳhaak nādān ne siine meñ uḌaa.ī huī hai

duur se tāpne vaale bhī jhulas sakte haiñ

terī ra.anā.ī ne vo aag lagā.ī huī hai

rah ke siine meñ mire terā taraf-dār hai dil

saarī paTTī tirī āñkhoñ kī paḌhā.ī huī hai

ḳhush-numā manzaro itrāo na itnā ḳhud par

yaar ne zulf-e-hasīñ ruḳh pe girā.ī huī hai

ahl-e-taḳh.īl tasavvur meñ jise chhū na sakeñ

maiñ ne vo shakl nigāhoñ meñ basā.ī huī hai

aarzuon ne uchhal-kud machai hui hai

jab se tujh tak meri chahat ki rasai hui hai

mujh se israr hai dil ka ki banun sahrai

KHak nadan ne sine mein uDai hui hai

dur se tapne wale bhi jhulas sakte hain

teri ranai ne wo aag lagai hui hai

rah ke sine mein mere tera taraf-dar hai dil

sari paTTi teri aankhon ki paDhai hui hai

KHush-numa manzaro itrao na itna KHud par

yar ne zulf-e-hasin ruKH pe girai hui hai

ahl-e-taKHil tasawwur mein jise chhu na saken

main ne wo shakl nigahon mein basai hui hai