aaya hai har chaDhai ke baad ek utar bhi

aayā hai har chaḌhā.ī ke ba.ad ik utaar bhī

pastī se ham-kanār mile kohsār bhī

āḳhir ko thak ke baiTh ga.ī ik maqām par

kuchh duur mere saath chalī rahguzār bhī

dil kyuuñ dhaḌakne lagtā hai ubhre jo koī chaap

ab to nahīñ kisī kā mujhe intizār bhī

jab bhī sukūt-e-shām meñ aayā tirā ḳhayāl

kuchh der ko Thahar sā gayā ābshār bhī

kuchh ho gayā hai dhuup se ḳhākistarī badan

kuchh jam gayā hai raah kā mujh par ġhubār bhī

is fāsloñ ke dasht meñ rahbar vahī bane

jis kī nigāh dekh le sadiyoñ ke paar bhī

ai dost pahle qurb kā nashsha ajiib thā

maiñ sun sakā na apne badan kī pukār bhī

rasta bhī vāpsī kā kahīñ ban meñ kho gayā

ojhal huī nigāh se hirnoñ kī Daar bhī

kyuuñ ro rahe ho raah ke andhe charāġh ko

kyā bujh gayā havā se lahū kā sharār bhī

kuchh aql bhī hai bā.is-e-tauqīr ai 'shakeb'

kuchh aa ga.e haiñ bāloñ meñ chāñdī ke taar bhī

aaya hai har chaDhai ke baad ek utar bhi

pasti se ham-kanar mile kohsar bhi

aaKHir ko thak ke baiTh gai ek maqam par

kuchh dur mere sath chali rahguzar bhi

dil kyun dhaDakne lagta hai ubhre jo koi chap

ab to nahin kisi ka mujhe intizar bhi

jab bhi sukut-e-sham mein aaya tera KHayal

kuchh der ko Thahar sa gaya aabshaar bhi

kuchh ho gaya hai dhup se KHakistari badan

kuchh jam gaya hai rah ka mujh par ghubar bhi

is faslon ke dasht mein rahbar wahi bane

jis ki nigah dekh le sadiyon ke par bhi

ai dost pahle qurb ka nashsha ajib tha

main sun saka na apne badan ki pukar bhi

rasta bhi wapsi ka kahin ban mein kho gaya

ojhal hui nigah se hirnon ki Dar bhi

kyun ro rahe ho rah ke andhe charagh ko

kya bujh gaya hawa se lahu ka sharar bhi

kuchh aql bhi hai bais-e-tauqir ai 'shakeb'

kuchh aa gae hain baalon mein chandi ke tar bhi