aaya nahin hai rah pe charKH-e-kuhan abhi

aayā nahīñ hai raah pe charḳh-e-kuhan abhī

ḳhatre meñ dekhtā huuñ chaman kā chaman abhī

uTTheñge apnī bazm se mansūr saikaḌoñ

kaam ahl-e-haq ke ā.eñge dār-o-rasan abhī

ranj-o-mehan nigāh jo phereñ to pher leñ

lekin mujhe 'azīz haiñ ranj-o-mehan abhī

baḌhne do aur shauq-e-shahādat avaam meñ

kuchh bāñjh to nahīñ hai ye ḳhāk-e-vatan abhī

āñkhoñ kī surḳhiyāñ haiñ azā.em kā ishtihār

siine sulag rahe haiñ lagī hai lagan abhī

ye kārvāñ shanāvar-e-tūfāñ to hai magar

chehroñ pe boltī hai safar kī thakan abhī

haiñ sāmne hamāre rivāyāt-e-kār-zār

bāñdhe hue haiñ sar se mujāhid kafan abhī

ban ban ke jaane kitne fanā hoñge somnāt

baste haiñ har galī meñ yahāñ but-shikan abhī

ai shahryār ham se shikasta-diloñ meñ aa

terī taraf se ḳhalq ko hai husn-e-zan abhī

raqsāñ abhī haiñ shām-e-ġharībāñ kī jhalkiyāñ

raushan nahīñ hai ḳhanda-e-sub.h-e-vatan abhī

jiite raheñ umiid pe rindān-e-tishna-kām

chaltā nahīñ hai daur-e-sharāb-e-kuhan abhī

jin ke lahū se qasr-e-vafā meñ jale charāġh

in ġham-zadoñ meñ 'aam haiñ ranj-o-mehan abhī

gulshan se phuul chal ke mazāroñ tak aa ga.e

lekin hai bāġhbāñ kī jabīñ par shikan abhī

hai 'ilm kī nigāh se pinhāñ rah-e-amal

kahte nahīñ kafan ko yahāñ pairahan abhī

nabz-e-bahār par haiñ bagūloñ kī uñgliyāñ

chalne ko chal rahī hai nasīm-e-chaman abhī

shabnam ke ashk sūkhne detī nahīñ fazā

hañstā hai ḳhud bahār-e-chaman par chaman abhī

har gaam har maqām pe koshish ke bāvajūd

'dānish' na aa sakā mujhe jiine kā fan abhī

aaya nahin hai rah pe charKH-e-kuhan abhi

KHatre mein dekhta hun chaman ka chaman abhi

uTThenge apni bazm se mansur saikaDon

kaam ahl-e-haq ke aaenge dar-o-rasan abhi

ranj-o-mehan nigah jo pheren to pher len

lekin mujhe 'aziz hain ranj-o-mehan abhi

baDhne do aur shauq-e-shahadat awam mein

kuchh banjh to nahin hai ye KHak-e-watan abhi

aankhon ki surKHiyan hain azaem ka ishtihaar

sine sulag rahe hain lagi hai lagan abhi

ye karwan shanawar-e-tufan to hai magar

chehron pe bolti hai safar ki thakan abhi

hain samne hamare riwayat-e-kar-zar

bandhe hue hain sar se mujahid kafan abhi

ban ban ke jaane kitne fana honge somnat

baste hain har gali mein yahan but-shikan abhi

ai shahryar hum se shikasta-dilon mein aa

teri taraf se KHalq ko hai husn-e-zan abhi

raqsan abhi hain sham-e-ghariban ki jhalkiyan

raushan nahin hai KHanda-e-subh-e-watan abhi

jite rahen umid pe rindan-e-tishna-kaam

chalta nahin hai daur-e-sharab-e-kuhan abhi

jin ke lahu se qasr-e-wafa mein jale charagh

in gham-zadon mein 'am hain ranj-o-mehan abhi

gulshan se phul chal ke mazaron tak aa gae

lekin hai baghban ki jabin par shikan abhi

hai 'ilm ki nigah se pinhan rah-e-amal

kahte nahin kafan ko yahan pairahan abhi

nabz-e-bahaar par hain bagulon ki ungliyan

chalne ko chal rahi hai nasim-e-chaman abhi

shabnam ke ashk sukhne deti nahin faza

hansta hai KHud bahaar-e-chaman par chaman abhi

har gam har maqam pe koshish ke bawajud

'danish' na aa saka mujhe jine ka fan abhi