aazad ho chuka koi zanjir ho chuka

āzād ho chukā koī zanjīr ho chukā

ya.anī dayār-e-ḳhvāb bhī tasḳhīr ho chukā

pārīna ho chukī hai bahut dāstān-e-ishq

ik shahr-e-dasht najd meñ ta.amīr ho chukā

barbād kar chukā huuñ bahut kuchh ba-nām-e-ḳhvesh

aur jo bachā thā ġhair kī jāgīr ho chukā

kyā vaqt aa gayā hai mirī nasl par ki ab

merā adū bhī sāhab-e-tauqīr ho chukā

saiqal kiyā hai maiñ ne ise apne ḳhuun se

kis darja saaf ab ruḳh-e-shamshīr ho chukā

kaisī badal ke rah ga.ī hai merī kā.enāt

vo ḳhush-mizāj phuul bhī dil-gīr ho chukā

'sājid' nigāh Dāliye ab ird-gard bhī

zikr-e-rumūz rañg-e-asātīr ho chukā

aazad ho chuka koi zanjir ho chuka

yani dayar-e-KHwab bhi tasKHir ho chuka

parina ho chuki hai bahut dastan-e-ishq

ek shahr-e-dasht najd mein tamir ho chuka

barbaad kar chuka hun bahut kuchh ba-nam-e-KHwesh

aur jo bacha tha ghair ki jagir ho chuka

kya waqt aa gaya hai meri nasl par ki ab

mera adu bhi sahab-e-tauqir ho chuka

saiqal kiya hai main ne ise apne KHun se

kis darja saf ab ruKH-e-shamshir ho chuka

kaisi badal ke rah gai hai meri kaenat

wo KHush-mizaj phul bhi dil-gir ho chuka

'sajid' nigah Daliye ab ird-gard bhi

zikr-e-rumuz rang-e-asatir ho chuka