ab ek dard bhi dil mein nazar nahin aata

ab ek dard bhī dil meñ nazar nahīñ aatā

kisī ke kaam koī umr-bhar nahīñ aatā

ye dil bhī dost farāmosh kam nahīñ tujh se

ki muddatoñ nahīñ aatā jidhar nahīñ aatā

na so.eñ din ko vo rātoñ ko jāgte haiñ zarūr

nahīñ to aañkh meñ itnā asar nahīñ aatā

unhīñ kī baat haiñ jo maiñ ne yaad kar lī haiñ

magar vo un kī zabāñ kā asar nahīñ aatā

murāqabe meñ hai kyā kyā mushāhida ai shaiḳh

baġhair us ke nazar meñ asar nahīñ aatā

adam ke naam se har ek kyuuñ rahe bashshāsh

har ek shaḳhs ko lutf-e-safar nahīñ aatā

ilaaj aur maraz meñ na thī koī nisbat

hamāre sāmne ab chāragar nahīñ aatā

ghuTī hī jaatī haiñ har roz quvvateñ dil kī

maiñ us ke sadqe jo armān bar nahīñ aatā

duā ke Dhañg hī ahbāb ko nahīñ aate

ġhalat hai ye ki duā meñ asar nahīñ aatā

vo dard mol ki ho rāt-din kī niiñd harām

to dekh aah meñ kaisā asar nahīñ aatā

usī ne kah diyā achchhā huā ki vo kyā hai

mirī samajh meñ to ye umr-bhar nahīñ aatā

safī' ko shā.irī aatī hai vo bhī kuchh yuuñ hī

use bas aur to koī hunar nahīñ aatā

ab ek dard bhi dil mein nazar nahin aata

kisi ke kaam koi umr-bhar nahin aata

ye dil bhi dost faramosh kam nahin tujh se

ki muddaton nahin aata jidhar nahin aata

na soen din ko wo raaton ko jagte hain zarur

nahin to aankh mein itna asar nahin aata

unhin ki baat hain jo main ne yaad kar li hain

magar wo un ki zaban ka asar nahin aata

muraqabe mein hai kya kya mushahida ai shaiKH

baghair us ke nazar mein asar nahin aata

adam ke nam se har ek kyun rahe bashshash

har ek shaKHs ko lutf-e-safar nahin aata

ilaj aur maraz mein na thi koi nisbat

hamare samne ab chaaragar nahin aata

ghuTi hi jati hain har roz quwwaten dil ki

main us ke sadqe jo arman bar nahin aata

dua ke Dhang hi ahbab ko nahin aate

ghalat hai ye ki dua mein asar nahin aata

wo dard mol ki ho raat-din ki nind haram

to dekh aah mein kaisa asar nahin aata

usi ne kah diya achchha hua ki wo kya hai

meri samajh mein to ye umr-bhar nahin aata

safi' ko shairi aati hai wo bhi kuchh yun hi

use bas aur to koi hunar nahin aata