ab mujhe gulshan se kya jab zer-e-dam aa hi gaya

ab mujhe gulshan se kyā jab zer-e-dām aa hī gayā

ik nasheman thā so vo bijlī ke kaam aa hī gayā

sun ma.āl-e-soz-e-ulfat jab ye naam aa hī gayā

sham.a āḳhir jal-bujhī parvāna kaam aa hī gayā

tālib-e-dīdār kā isrār kaam aa hī gayā

sāmne koī ba-husn-e-intizām aa hī gayā

koshish-e-manzil se to achchhī rahī dīvāngī

chalte-phirte un se milne kā maqām aa hī gayā

rāz-e-ulfat marne vaale ne chhupāyā to bahut

dam nikalte vaqt lab par un kā naam aa hī gayā

kar diyā mash.hūr parde meñ tujhe zahmat na dī

aaj ko honā hamārā tere kaam aa hī gayā

jab uThā saaqī to vaa.iz kī na kuchh bhī chal sakī

merī qismat kī tarah gardish meñ jaam aa hī gayā

husn ko bhī ishq kī zid rakhnī paḌtī hai kabhī

tuur par muusā se milne kā payām aa hī gayā

der tak bāb-e-haram par ruk ke ik majbūr-e-ishq

sū-e-but-ḳhāna ḳhudā kā le ke naam aa hī gayā

raat bhar māñgī duā un ke na jaane kī 'qamar'

sub.h kā taara magar le kar payām aa hī gayā

ab mujhe gulshan se kya jab zer-e-dam aa hi gaya

ek nasheman tha so wo bijli ke kaam aa hi gaya

sun maal-e-soz-e-ulfat jab ye nam aa hi gaya

shama aaKHir jal-bujhi parwana kaam aa hi gaya

talib-e-didar ka israr kaam aa hi gaya

samne koi ba-husn-e-intizam aa hi gaya

koshish-e-manzil se to achchhi rahi diwangi

chalte-phirte un se milne ka maqam aa hi gaya

raaz-e-ulfat marne wale ne chhupaya to bahut

dam nikalte waqt lab par un ka nam aa hi gaya

kar diya mashhur parde mein tujhe zahmat na di

aaj ko hona hamara tere kaam aa hi gaya

jab uTha saqi to waiz ki na kuchh bhi chal saki

meri qismat ki tarah gardish mein jam aa hi gaya

husn ko bhi ishq ki zid rakhni paDti hai kabhi

tur par musa se milne ka payam aa hi gaya

der tak bab-e-haram par ruk ke ek majbur-e-ishq

su-e-but-KHana KHuda ka le ke nam aa hi gaya

raat bhar mangi dua un ke na jaane ki 'qamar'

subh ka tara magar le kar payam aa hi gaya