ab ye aankhen kisi taskin se tabinda nahin

ab ye āñkheñ kisī taskīn se tābinda nahīñ

maiñ ne rafta se ye jaanā hai ki ā.inda nahīñ

tere dil meñ koī ġham merā numā.inda nahīñ

āgahī terī mizha par abhī raḳhshanda nahīñ

dil-e-vīrāñ dam-e-īsā hai ga.e vaqt kī yaad

kaun sā lamha-e-rafta hai ki phir zinda nahīñ

tū bhī chāhe to na aa.egī vo biitī huī raat

hai vahī chāñd magar vaisā daraḳhshinda nahīñ

abr-e-āvāra se mujh ko hai vafā kī ummīd

barq-e-betāb se shikva hai ki pā.inda nahīñ

kabhī ġhunche ko mahakne se koī rok sakā

shauq agar hai to phir iz.hār se sharminda nahīñ

ab ye aankhen kisi taskin se tabinda nahin

main ne rafta se ye jaana hai ki aainda nahin

tere dil mein koi gham mera numainda nahin

aagahi teri mizha par abhi raKHshanda nahin

dil-e-viran dam-e-isa hai gae waqt ki yaad

kaun sa lamha-e-rafta hai ki phir zinda nahin

tu bhi chahe to na aaegi wo biti hui raat

hai wahi chand magar waisa daraKHshinda nahin

abr-e-awara se mujh ko hai wafa ki ummid

barq-e-betab se shikwa hai ki painda nahin

kabhi ghunche ko mahakne se koi rok saka

shauq agar hai to phir izhaar se sharminda nahin