ab ye kaifiyyat-e-dil hai ki chhupae na bane

ab ye kaifiyyat-e-dil hai ki chhupā.e na bane

aur jo vo pūchheñ ki kyā hai to batā.e na bane

tum ko āzurdagī-e-dil kā mazā kyā ma.alūm

kaash tum se bhī koī kaam banā.e na bane

tū ne kyuuñ un ko ġham-e-zīst diyā hai yārab

jin se ik rañj-e-mohabbat bhī uThā.e na bane

haa.e kyā pās-e-mohabbat hai ki tanhā.ī meñ bhī

ashk āñkhoñ meñ rahe aur bahā.e na bane

ham-nashīñ pūchh na is bazm kī rasmeñ ki jahāñ

mujh se vahshī ko bhī bin hosh meñ aa.e na bane

vaqt kī chāragarī yuuñ to musallam hai magar

zaḳhm bhī vo hai ki tā-umr dabā.e na bane

ye bhī ik rasm-e-tamāshā hai vahāñ ai 'ālī'

dekhte rahiye magar aañkh uThā.e na bane

ab ye kaifiyyat-e-dil hai ki chhupae na bane

aur jo wo puchhen ki kya hai to batae na bane

tum ko aazurdagi-e-dil ka maza kya malum

kash tum se bhi koi kaam banae na bane

tu ne kyun un ko gham-e-zist diya hai yarab

jin se ek ranj-e-mohabbat bhi uThae na bane

hae kya pas-e-mohabbat hai ki tanhai mein bhi

ashk aankhon mein rahe aur bahae na bane

ham-nashin puchh na is bazm ki rasmen ki jahan

mujh se wahshi ko bhi bin hosh mein aae na bane

waqt ki chaaragari yun to musallam hai magar

zaKHm bhi wo hai ki ta-umr dabae na bane

ye bhi ek rasm-e-tamasha hai wahan ai 'ali'

dekhte rahiye magar aankh uThae na bane