abhi apne martaba-e-husn se miyan ba-KHabar tu hua nahin

abhī apne martaba-e-husn se miyāñ bā-ḳhabar tū huā nahīñ

ki ġhazal-sarā tire baaġh meñ koī murġh-e-tāza-navā nahīñ

jo galī meñ yaar kī jā.ūñ huuñ to ajal kahe hai ye rahm khā

tū sitam-rasīda na jā udhar koī zinda vaañ se phirā nahīñ

vo ġharīb-o-be-kas-o-zār thā tujhe us kā detā huuñ maiñ pata

tire kushta kā vo mazār thā ki charāġh jis meñ jalā nahīñ

jo hakīm paas maiñ jā.ūñ huuñ to vo dostī se sunā.e hai

tū ma.āsh kī bhī talāsh kar ye maqām-e-faqr-o-fanā nahīñ

mujhe ishq rakhtā hai sar-nigūñ mirā jaal pūchho na kyā kahūñ

maiñ habāb-e-bahr kā shīsha huuñ mire TūTne kī sadā nahīñ

tire ḳhāksāroñ ne apnā sar nahīñ piiTā dasht meñ is qadar

ki bagūla vaañ se ġhubār kā taraf āsmāñ ke gayā nahīñ

na nasīm-e-bāġh-o-bahār huuñ na fidā-e-rū-e-nigār huuñ

maiñ ġharīb-e-shahr-o-dayār huuñ mirī dair o ka.aba meñ jā nahīñ

tire naḳhl-e-husn kī koñpleñ abhī nā-shagufta haiñ ai parī

jo nasīm aa.ī hai us ne bhī inheñ kuchh samajh ke chhuā nahīñ

tire gesuoñ meñ jo jaatī hai to mirā hī haal kah aatī hai

mirī ḳhasm-e-jāñ bhī to is qadar ye nasīm-e-nāfā-kushā nahīñ

na maiñ rahne vaalā huuñ baaġh kā na safīr-sanj huuñ raag kā

mujhe DhūñDe hai so vo kis jagah kahīñ āshiyān-e-humā nahīñ

koī zaḳhm-ḳhurda hai ḳhaar kā koī ḳhūñ-tapīda bahār kā

hai mirā hī hausla 'mus.hafī' ki kisī se mujh ko gilā nahīñ

abhi apne martaba-e-husn se miyan ba-KHabar tu hua nahin

ki ghazal-sara tere bagh mein koi murgh-e-taza-nawa nahin

jo gali mein yar ki jaun hun to ajal kahe hai ye rahm kha

tu sitam-rasida na ja udhar koi zinda wan se phira nahin

wo gharib-o-be-kas-o-zar tha tujhe us ka deta hun main pata

tere kushta ka wo mazar tha ki charagh jis mein jala nahin

jo hakim pas main jaun hun to wo dosti se sunae hai

tu maash ki bhi talash kar ye maqam-e-faqr-o-fana nahin

mujhe ishq rakhta hai sar-nigun mera jal puchho na kya kahun

main habab-e-bahr ka shisha hun mere TuTne ki sada nahin

tere KHaksaron ne apna sar nahin piTa dasht mein is qadar

ki bagula wan se ghubar ka taraf aasman ke gaya nahin

na nasim-e-bagh-o-bahaar hun na fida-e-ru-e-nigar hun

main gharib-e-shahr-o-dayar hun meri dair o kaba mein ja nahin

tere naKHl-e-husn ki konplen abhi na-shagufta hain ai pari

jo nasim aai hai us ne bhi inhen kuchh samajh ke chhua nahin

tere gesuon mein jo jati hai to mera hi haal kah aati hai

meri KHasm-e-jaan bhi to is qadar ye nasim-e-nafa-kusha nahin

na main rahne wala hun bagh ka na safir-sanj hun rag ka

mujhe DhunDe hai so wo kis jagah kahin aashiyan-e-huma nahin

koi zaKHm-KHurda hai KHar ka koi KHun-tapida bahaar ka

hai mera hi hausla 'mushafi' ki kisi se mujh ko gila nahin