abhi se lae ho kyon dil ki rah par usko

abhī se laa.e ho kyoñ dil kī raah par us ko

bhaTakne denā thā kuchh din idhar-udhar us ko

vo musht-e-ḳhāk ki uḌne se āshnā hī na thī

lagā diye haiñ tamanna ne bāl-o-par us ko

na jaane kab vo mujhe chhoḌ kar chalā jaa.e

maiñ zindagī kī tarah kar chukā basar us ko

is iḳhtisār kī tafsīl kaun dekhegā

bikhar gayā huuñ maiñ kitnā sameT kar us ko

na ḳhvāb hī se jagāyā na intizār kiyā

ham is daf'a bhī chale aa.e chuum kar us ko

vo jis kā naam bhī sunñā hameñ pasand na thā

kiyā hai roz ke jhagḌoñ ne mo'tabar us ko

chalā gayā thā vo kashtī meñ baiTh kar 'tābish'

havā hai shahr meñ kyā is kī kyā ḳhabar us ko

abhi se lae ho kyon dil ki rah par us ko

bhaTakne dena tha kuchh din idhar-udhar us ko

wo musht-e-KHak ki uDne se aashna hi na thi

laga diye hain tamanna ne baal-o-par us ko

na jaane kab wo mujhe chhoD kar chala jae

main zindagi ki tarah kar chuka basar us ko

is iKHtisar ki tafsil kaun dekhega

bikhar gaya hun main kitna sameT kar us ko

na KHwab hi se jagaya na intizar kiya

hum is daf'a bhi chale aae chum kar us ko

wo jis ka nam bhi sunna hamein pasand na tha

kiya hai roz ke jhagDon ne mo'tabar us ko

chala gaya tha wo kashti mein baiTh kar 'tabish'

hawa hai shahr mein kya is ki kya KHabar us ko