adu-e-din-o-iman dushman-e-amn-o-aman nikle

adū-e-dīn-o-īmāñ dushman-e-amn-o-amāñ nikle

tire paikāñ baḌe jābir baḌe nā-mehrbāñ nikle

adāoñ ne lubhāyā dī nigāh-e-nāz ne dāvat

magar alfāz dil-shikanī meñ merī kāmrāñ nikle

mukar lo ishq se lekin sar-e-mahshar na kahnā kuchh

vahāñ par kaun jaane koī apnā rāz-dāñ nikle

tumhārī bazm hai rutbe meñ jannat se bhī bālā-tar

yahāñ piirī meñ aa.e ham magar ho kar javāñ nikle

baḌā charchā hai koh-e-tūr kā vādī-e-aiman kā

bahut aġhlab hai vo dar-parda merī dāstāñ nikle

bayābāñ meñ chaman meñ dasht meñ yā koh-e-vīrāñ meñ

ḳhudā jaane kahāñ pahuñche jo sū-e-āshiyāñ nikle

hamārī maut bhī ik mauj hai dariyā-e-hastī kī

bas ik ġhota lagānā hai yahāñ Duube vahāñ nikle

mo'attar kar ga.ī bū-e-vafā māhaul-e-ālam ko

mire har qatra-e-ḳhūñ se hazāroñ gulsitāñ nikle

chhupe haiñ saat pardoñ meñ ye sab kahne kī bāteñ haiñ

unheñ merī nigāhoñ ne jahāñ DhūñDā vahāñ nikle

ye vaqt-e-naz' kaisā kaisī takmīl-e-hayāt ai dil

ummīdeñ kab huiiñ puurī abhī armāñ kahāñ nikle

ḳhudā kā shukr be-dām-o-diram the mai-kade meñ ham

magar pīr-e-muġhāñ apne purāne mehrbāñ nikle

haqīqat ko jo dekhā ik na.ī duniyā nazar aa.ī

sitam goyā karam thā dushman-e-jāñ pāsbāñ nikle

mohabbat meñ luTe lekin bahut achchhe rahe 'rahbar'

gumāñ thā jin pe rahzan kā vo mīr-e-kārvāñ nikle

adu-e-din-o-iman dushman-e-amn-o-aman nikle

tere paikan baDe jabir baDe na-mehrban nikle

adaon ne lubhaya di nigah-e-naz ne dawat

magar alfaz dil-shikani mein meri kaamran nikle

mukar lo ishq se lekin sar-e-mahshar na kahna kuchh

wahan par kaun jaane koi apna raaz-dan nikle

tumhaari bazm hai rutbe mein jannat se bhi baala-tar

yahan piri mein aae hum magar ho kar jawan nikle

baDa charcha hai koh-e-tur ka wadi-e-aiman ka

bahut aghlab hai wo dar-parda meri dastan nikle

bayaban mein chaman mein dasht mein ya koh-e-viran mein

KHuda jaane kahan pahunche jo su-e-ashiyan nikle

hamari maut bhi ek mauj hai dariya-e-hasti ki

bas ek ghota lagana hai yahan Dube wahan nikle

mo'attar kar gai bu-e-wafa mahaul-e-alam ko

mere har qatra-e-KHun se hazaron gulsitan nikle

chhupe hain sat pardon mein ye sab kahne ki baaten hain

unhen meri nigahon ne jahan DhunDa wahan nikle

ye waqt-e-naz' kaisa kaisi takmil-e-hayat ai dil

ummiden kab huin puri abhi arman kahan nikle

KHuda ka shukr be-dam-o-diram the mai-kade mein hum

magar pir-e-mughan apne purane mehrban nikle

haqiqat ko jo dekha ek nai duniya nazar aai

sitam goya karam tha dushman-e-jaan pasban nikle

mohabbat mein luTe lekin bahut achchhe rahe 'rahbar'

guman tha jin pe rahzan ka wo mir-e-karwan nikle