agar KHu-e-tahammul ho to koi gham nahin hota

agar ḳhū-e-tahammul ho to koī ġham nahīñ hotā

gile shikve se rañg-e-zindagī kuchh kam nahīñ hotā

bujhī jaatī haiñ sham.eñ rahguzār-e-zindagānī kī

charāġh-e-ārzū lekin kabhī maddham nahīñ hotā

ḳhudā ke sāmne jo sar yaqīñ ke saath jhuk jaa.e

kisī tāqat ke aage phir kabhī vo ḳham nahīñ hotā

atā kī hai ḳhudā ne ilm kī daulat agar tujh ko

saḳhāvat kar saḳhāvat ye ḳhazāna kam nahīñ hotā

siyāsat juzv-e-īmāñ hai chalo yūñhī sahī lekin

koī murshid mizāj-e-vaqt kā mahram nahīñ hotā

urūj-e-paikar-e-ḳhākī se hai insāniyat larzāñ

fasād o sarkashī se paak ye aalam nahīñ hotā

suno āzādi-e-insāñ kā dhoñsā pīTne vaalo

har ik insāñ vaj.h-e-azmat-e-ādam nahīñ hotā

ba-qadr-e-zarf-o-himmat hai rasā.ī fikr-e-insāñ kī

har ik aamī rumūz-e-mulk kā mahram nahīñ hotā

agar KHu-e-tahammul ho to koi gham nahin hota

gile shikwe se rang-e-zindagi kuchh kam nahin hota

bujhi jati hain shamen rahguzar-e-zindagani ki

charagh-e-arzu lekin kabhi maddham nahin hota

KHuda ke samne jo sar yaqin ke sath jhuk jae

kisi taqat ke aage phir kabhi wo KHam nahin hota

ata ki hai KHuda ne ilm ki daulat agar tujh ko

saKHawat kar saKHawat ye KHazana kam nahin hota

siyasat juzw-e-iman hai chalo yunhi sahi lekin

koi murshid mizaj-e-waqt ka mahram nahin hota

uruj-e-paikar-e-KHaki se hai insaniyat larzan

fasad o sarkashi se pak ye aalam nahin hota

suno aazadi-e-insan ka dhonsa piTne walo

har ek insan wajh-e-azmat-e-adam nahin hota

ba-qadr-e-zarf-o-himmat hai rasai fikr-e-insan ki

har ek aami rumuz-e-mulk ka mahram nahin hota