ahl-e-danish ko KHabar kya kya hai pagal ka mizaj

ahl-e-dānish ko ḳhabar kyā kyā hai pāgal kā mizāj

sañg-bāroñ ko hai kab ma.alūm ghāyal kā mizāj

kis taraf se hai guzarnā aur barasnā hai kahāñ

bas havāoñ ko patā rahtā hai bādal kā mizāj

mere sar par rah ke bhī mujh par na saaya kar sakā

merī qismat se kahāñ miltā hai āñchal kā mizāj

tujh ko palkoñ meñ chhupā kar maiñ parastish kar to luuñ

āñsuoñ ke saath bah jaatā hai kājal kā mizāj

jitnā bhī chāhūñ nikalnā Dūbtī jaatī huuñ maiñ

terī yādoñ meñ milā hai mujh ko daldal kā mizāj

'mīnā' sadiyāñ aa.iiñ aur tārīḳh ban kar rah ga.iiñ

lamha lamha jāntā hai mere har pal kā mizāj

ahl-e-danish ko KHabar kya kya hai pagal ka mizaj

sang-baron ko hai kab malum ghayal ka mizaj

kis taraf se hai guzarna aur barasna hai kahan

bas hawaon ko pata rahta hai baadal ka mizaj

mere sar par rah ke bhi mujh par na saya kar saka

meri qismat se kahan milta hai aanchal ka mizaj

tujh ko palkon mein chhupa kar main parastish kar to lun

aansuon ke sath bah jata hai kajal ka mizaj

jitna bhi chahun nikalna Dubti jati hun main

teri yaadon mein mila hai mujh ko daldal ka mizaj

'mina' sadiyan aain aur tariKH ban kar rah gain

lamha lamha jaanta hai mere har pal ka mizaj