ai bad-gumāñ tirā hai gumāñ aur kī taraf
merā tire sivā nahīñ dhyāñ aur kī taraf
nāvak mujhe raqīb ko barchhī lagā.iye
tiir us taraf chale to sināñ aur kī taraf
mujh ko sunā ke ġhair ke uupar palaT piro
palTo jo guftugū meñ zabāñ aur kī taraf
hūr-o-parī pe kyā hai hamārā sivā.e yaar
dil aur kī taraf hai na jaañ aur kī taraf
ghar dil meñ tū hamāre ḳhudā ke liye na le
ai ḳhānumāñ-ḳharāb makāñ aur kī taraf
ham fāqa-mast rizq-e-muqaddar pe shaad haiñ
bheje ḳhudā ta.aam ke ḳhvāñ aur kī taraf
urdu meñ 'mus.hafī' ko bhī ustād kah ke 'shād'
āvāza kas gayā ye javāñ aur kī taraf
ai bad-guman tera hai guman aur ki taraf
mera tere siwa nahin dhyan aur ki taraf
nawak mujhe raqib ko barchhi lagaiye
tir us taraf chale to sinan aur ki taraf
mujh ko suna ke ghair ke upar palaT piro
palTo jo guftugu mein zaban aur ki taraf
hur-o-pari pe kya hai hamara siwae yar
dil aur ki taraf hai na jaan aur ki taraf
ghar dil mein tu hamare KHuda ke liye na le
ai KHanuman-KHarab makan aur ki taraf
hum faqa-mast rizq-e-muqaddar pe shad hain
bheje KHuda taam ke KHwan aur ki taraf
urdu mein 'mushafi' ko bhi ustad kah ke 'shad'
aawaza kas gaya ye jawan aur ki taraf
Source:
Sukhan-e-Bemisal: Deewan-e-Shad (pdf) and website (Pg. p-48 e-54 pdf-55)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.