اے برق تجلی فکر ہے یہ کیا تیرا بھرم رکھ پاؤں گی

اے برق تجلی فکر ہے یہ کیا تیرا بھرم رکھ پاؤں گی

مشتاق تو ہے دل جلووں کا آنکھیں وہ کہاں سے لاؤں گی

عشاق کی محفل خوب مگر کیا کام مرا جب تو ہی نہیں

دامن کو سمیٹوں گی اپنے خاموشی سے اٹھ جاؤں گی

دیکھو تو شکن پیشانی کی احساس کرو تو الجھن کا

خم آ بھی گئے کاکل میں اگر کاہے کو انہیں سلجھاؤں گی

سب حسن کے عاشق ہیں تیرے کافر کا بھی تو واعظ کا بھی تو

بس اب یہ بتا اے ہرجائی کیا میں ہی تیرا غم کھاؤں گی

بس تھوڑی سی بارش حسن ازل طوفاں کی ضرورت ہے ہی نہیں

پتھر تو نہیں کہ بہہ نہ سکوں خاشاک ہوں میں بہہ جاؤں گی

اک عالم جذب و مستی ہے مت پوچھ تمنا کوثرؔ کی

کچھ اور ذرا بڑھ جائے جنوں ہر طور تری ہو جاؤں گی