ai but jafa se apni liya kar wafa ka kaam

ai but jafā se apnī liyā kar vafā kā kaam

bandoñ ke kaam aa ki yahī hai ḳhudā kā kaam

kis jā thā qasd shauq ne pahuñchā diyā kidhar

kahte na the Thagoñ se na le rahnumā kā kaam

kahtā hai dil sunā mujhe gesū kī dāstāñ

aaj us ne sar pe Daal diyā hai balā kā kaam

tāsīr ko na aah se pūchhūñ to kyā karūñ

kyuuñ ḳhud uThā liyā dil-e-be-mudda.ā kā kaam

apnī sī tū to kar unheñ phir iḳhtiyār hai

sunñā hai un kā kaam pahuñchnā duā kā kaam

siine meñ daaġh khilte hī jaate haiñ har nafas

ab apnī saañs kartī hai bād-e-sabā kā kaam

muusā faqat na the tire ā.īna-dāroñ meñ

iisā bhī karte the lab-e-mojiz-numā kā kaam

har raat apnī āñkhoñ ko ronā hai farz-e-ain

tā.at-guzār karte haiñ jaise ḳhudā kā kaam

thā bhī zalīl husn kī sarkār meñ ye dil

kam-baḳht ko supurd huā iltijā kā kaam

ai 'shād' merī saḳht-zabānī pe hai ḳhamosh

nāseh bhī ab to karne lagā ambiyā kā kaam

ai but jafa se apni liya kar wafa ka kaam

bandon ke kaam aa ki yahi hai KHuda ka kaam

kis ja tha qasd shauq ne pahuncha diya kidhar

kahte na the Thagon se na le rahnuma ka kaam

kahta hai dil suna mujhe gesu ki dastan

aaj us ne sar pe Dal diya hai bala ka kaam

tasir ko na aah se puchhun to kya karun

kyun KHud uTha liya dil-e-be-muddaa ka kaam

apni si tu to kar unhen phir iKHtiyar hai

sunna hai un ka kaam pahunchna dua ka kaam

sine mein dagh khilte hi jate hain har nafas

ab apni sans karti hai baad-e-saba ka kaam

musa faqat na the tere aaina-daron mein

isa bhi karte the lab-e-mojiz-numa ka kaam

har raat apni aankhon ko rona hai farz-e-ain

taat-guzar karte hain jaise KHuda ka kaam

tha bhi zalil husn ki sarkar mein ye dil

kam-baKHt ko supurd hua iltija ka kaam

ai 'shad' meri saKHt-zabani pe hai KHamosh

naseh bhi ab to karne laga ambiya ka kaam