ai dil-e-nadan mataa-e-kam-nigahi par na ja

ai dil-e-nādāñ matā.a-e-kam-nigāhī par na jā

aur bhī kuchh dekh jismoñ kī adā hī par na jā

dil meñ jo poshīda hai vo hasrat-e-tā'mīr dekh

dekhne vaale mire dil kī tabāhī par na jā

ye to hai merī tabī'at ye to hai merā mizāj

maiñ tirā banda huuñ merī kaj-kulāhī par na jā

merī niyyat ko parakh mere ‘amal ko tū na dekh

mere dāman par hai jo tū us siyāhī par na jā

huuñ sarāpā jurm chehre par jo aatī hai nazar

dāvar-e-mahshar mirī is be-gunāhī par na jā

kal isī zulmat se hī phūTeñgī kirneñ nuur kī

ye jo baḌhtī aa rahī hai is siyāhī par na jā

chaar din kā khel hai ālam-panāhī kā ye khel

chashm-e-bīnā satvat-e-ālam-panāhī par na jā

ai dil-e-nadan mataa-e-kam-nigahi par na ja

aur bhi kuchh dekh jismon ki ada hi par na ja

dil mein jo poshida hai wo hasrat-e-ta'mir dekh

dekhne wale mere dil ki tabahi par na ja

ye to hai meri tabi'at ye to hai mera mizaj

main tera banda hun meri kaj-kulahi par na ja

meri niyyat ko parakh mere ‘amal ko tu na dekh

mere daman par hai jo tu us siyahi par na ja

hun sarapa jurm chehre par jo aati hai nazar

dawar-e-mahshar meri is be-gunahi par na ja

kal isi zulmat se hi phuTengi kirnen nur ki

ye jo baDhti aa rahi hai is siyahi par na ja

chaar din ka khel hai aalam-panahi ka ye khel

chashm-e-bina satwat-e-alam-panahi par na ja