ai husn jab se raaz tera pa gae hain hum

ai husn jab se raaz tirā pā ga.e haiñ ham

hastī se apnī aur qarīb aa ga.e haiñ ham

yuuñ bhī huā ki jaan gañvā dī tire liye

yuuñ bhī huā ki tujh se bhī katrā ga.e haiñ ham

rāh-e-vafā meñ aise maqāmāt bhī mile

apnā sar-e-niyāz bhī Thukrā ga.e haiñ ham

yādash-ba-ḳhair ik gul-e-shādāb the kabhī

aisī ḳhizāñ paḌī hai ki kumhlā ga.e haiñ ham

sub.h-e-visāl thī to tabī.at thī baaġh baaġh

shām-e-firāq aa.ī to sañvlā ga.e haiñ ham

insān terī fat.h pe ab bhī yaqīn hai

go apnī zindagī se bhī ghabrā ga.e haiñ ham

mahrūmiyoñ kā bār-e-girāñ dosh par liye

ai maut sun ki tere qarīb aa ga.e haiñ ham

apne subū meñ talḳhī-e-daurāñ sameT kar

bā-sad-ḳhulūs nosh bhī farmā ga.e haiñ ham

tārīḳh-e-inqilāb-e-zamāna se pūchh lo

jab jab sadā milī sar-e-dār aa ga.e haiñ ham

'ajmal' jab un kī bazm meñ chheḌī hai dil kī baat

apne to ḳhair ġhair ko taḌpā ga.e haiñ ham

ai husn jab se raaz tera pa gae hain hum

hasti se apni aur qarib aa gae hain hum

yun bhi hua ki jaan ganwa di tere liye

yun bhi hua ki tujh se bhi katra gae hain hum

rah-e-wafa mein aise maqamat bhi mile

apna sar-e-niyaz bhi Thukra gae hain hum

yaadash-ba-KHair ek gul-e-shadab the kabhi

aisi KHizan paDi hai ki kumhla gae hain hum

subh-e-visal thi to tabiat thi bagh bagh

sham-e-firaq aai to sanwla gae hain hum

insan teri fath pe ab bhi yaqin hai

go apni zindagi se bhi ghabra gae hain hum

mahrumiyon ka bar-e-giran dosh par liye

ai maut sun ki tere qarib aa gae hain hum

apne subu mein talKHi-e-dauran sameT kar

ba-sad-KHulus nosh bhi farma gae hain hum

tariKH-e-inqilab-e-zamana se puchh lo

jab jab sada mili sar-e-dar aa gae hain hum

'ajmal' jab un ki bazm mein chheDi hai dil ki baat

apne to KHair ghair ko taDpa gae hain hum