ai masiha-dam tere hote hue kya ho gaya

ai masīhā-dam tire hote hue kyā ho gayā

baiThe-biThlā.e marīz-e-ishq ThanDā ho gayā

yuuñ mirā soz-e-jigar duniyā meñ rusvā ho gayā

sher-o-naġhma rañg-o-nik.hat jām-o-sahbā ho gayā

chāragar kis kaam kī baḳhiya-garī terī ki ab

aur bhī chāk-e-jigar merā huvaidā ho gayā

hai tirī zulf-e-pareshāñ yā mirī dīvāngī

jo tamāsha karne aayā ḳhud tamāshā ho gayā

haa.e ye taaza havā gulshan meñ kaisī chal paḌī

bulbul-e-bāġh-o-bahārāñ rū-ba-sahrā ho gayā

umr-bhar kī mushkileñ pal bhar meñ āsāñ ho ga.iiñ

un ke aate haiñ marīz-e-ishq achchhā ho gayā

kyā mire zaḳhm-e-jigar se khil uThī hai chāñdnī

kin charāġhoñ se zamāne meñ ujālā ho gayā

har tarah māyūs aur mahrūm ho kar pyaar se

jis ke tum pyāre the vo maulā ko pyārā ho gayā

ham gunahgāroñ kī laġhzish hashr meñ kaam aa ga.ī

chashm-e-nam kā dāman-e-tar ko sahārā ho gayā

ik mirī shāḳh-e-nasheman phūñkne ke vāste

kis kī kaj-fahmī se ghar-bhar meñ ujālā ho gayā

ab shafaq yā abr kā 'gulzār' kyuuñ ho intizār

un kī āñkhoñ se jo piine kā ishāra ho gayā

ai masiha-dam tere hote hue kya ho gaya

baiThe-biThlae mariz-e-ishq ThanDa ho gaya

yun mera soz-e-jigar duniya mein ruswa ho gaya

sher-o-naghma rang-o-nikhat jam-o-sahba ho gaya

chaaragar kis kaam ki baKHiya-gari teri ki ab

aur bhi chaak-e-jigar mera huwaida ho gaya

hai teri zulf-e-pareshan ya meri diwangi

jo tamasha karne aaya KHud tamasha ho gaya

hae ye taza hawa gulshan mein kaisi chal paDi

bulbul-e-bagh-o-bahaaran ru-ba-sahra ho gaya

umr-bhar ki mushkilen pal bhar mein aasan ho gain

un ke aate hain mariz-e-ishq achchha ho gaya

kya mere zaKHm-e-jigar se khil uThi hai chandni

kin charaghon se zamane mein ujala ho gaya

har tarah mayus aur mahrum ho kar pyar se

jis ke tum pyare the wo maula ko pyara ho gaya

hum gunahgaron ki laghzish hashr mein kaam aa gai

chashm-e-nam ka daman-e-tar ko sahaara ho gaya

ek meri shaKH-e-nasheman phunkne ke waste

kis ki kaj-fahmi se ghar-bhar mein ujala ho gaya

ab shafaq ya abr ka 'gulzar' kyun ho intizar

un ki aankhon se jo pine ka ishaara ho gaya