ai waqt tu guzarne laga kis maqam se

ai vaqt tū guzarne lagā kis maqām se

bezār hai zamāna mohabbat ke naam se

nazreñ milīñ to āñkhoñ ne dekhe hazār ḳhvāb

lākhoñ gumān ubhre tumhāre salām se

jin kī ragoñ meñ ḳhuun hai rishvat kā vo mujhe

āgāh kar rahe haiñ halāl-o-harām se

mullā zamāna-sāz hai panDit hai zar-parast

donoñ ko kuchh ġharaz nahīñ rahmān-o-rām se

ahbāb khā ga.e haiñ fareb-e-ziyāñ-o-sūd

byopār ho rahā hai mohabbat ke naam se

ab raat ho chukī hai ai āvārgī chalūñ

āvāz de rahā hai koī mujh ko shaam se

tujh meñ shabīh paa.ī hai māh-e-tamām kī

tashbīh tujh ko kyoñ na duuñ māh-e-tamām se

be-laus milne vaalā ab aatā nahīñ koī

aate haiñ ab jo log vo aate haiñ kaam se

mauzū' chāhe koī ho mere kalām kā

maiñ ham-kalām hotā huuñ 'ash.har' 'avām se

ai waqt tu guzarne laga kis maqam se

bezar hai zamana mohabbat ke nam se

nazren milin to aankhon ne dekhe hazar KHwab

lakhon guman ubhre tumhaare salam se

jin ki ragon mein KHun hai rishwat ka wo mujhe

aagah kar rahe hain halal-o-haram se

mulla zamana-saz hai panDit hai zar-parast

donon ko kuchh gharaz nahin rahman-o-ram se

ahbab kha gae hain fareb-e-ziyan-o-sud

byopar ho raha hai mohabbat ke nam se

ab raat ho chuki hai ai aawargi chalun

aawaz de raha hai koi mujh ko sham se

tujh mein shabih pai hai mah-e-tamam ki

tashbih tujh ko kyon na dun mah-e-tamam se

be-laus milne wala ab aata nahin koi

aate hain ab jo log wo aate hain kaam se

mauzu' chahe koi ho mere kalam ka

main ham-kalam hota hun 'ashhar' 'awam se