امانؔ اپنی طرح آشنائے فن تو نہیں

امانؔ اپنی طرح آشنائے فن تو نہیں

نشست جاں میں کوئی اپنا ہم سخن تو نہیں

نکل کے حجرۂ تنہائی سے کسی سے عشق

تمہارے کہنے پہ کرتے ہیں اپنا من تو نہیں

برا نہ مان مگر پوچھنا تو پڑتا ہے

کہ بے وفائی کہیں تجھ میں فطرتاً تو نہیں

یہ تو نے عشق جتایا تو میں نے مان لیا

ہمارے بیچ مگر ایسا غالباً تو نہیں

قسم صبا کی یہ خوشبو ہے جانی پہچانی

گلوں کے جسم پہ تیرا ہی پیرہن تو نہیں

کیوں آج منظر شب اتنا سہما سہما ہے

کسی چراغ کی زد پر ہوا کا تن تو نہیں

ہے ٹوٹ جانے کے خدشے میں یاد کی کشتی

فرات فرقت جاں آج موجزن تو نہیں

صدائیں آتی ہیں جنگل سے آہ و زاری کی

پتہ کرو کہ پرندوں کی انجمن تو نہیں