anjaan rasta tha ki lahore aa gaya

anjān rāsta thā ki lahore aa gayā

dil bhī bujhā huā thā ki lahore aa gayā

dhaḌkā lagā huā thā ki sab kuchh badal gayā

sab kuchh nayā nayā thā ki lahore aa gayā

dil ko kahāñ huī thī mire āḳhirī shikast

maiñ soch hī rahā thā ki lahore aa gayā

terī galī ke dhyān meñ manzil badal ga.ī

Dallas ko jā rahā thā ki lahore aa gayā

ḳhālī saḌak thī aur mire hāthoñ meñ us kā haath

ye ek sāniha thā ki lahore aa gayā

'sayyad' utar rahī thī koī aur hī ġhazal

kuchh aur likh rahā thā ki lahore aa gayā

anjaan rasta tha ki lahore aa gaya

dil bhi bujha hua tha ki lahore aa gaya

dhaDka laga hua tha ki sab kuchh badal gaya

sab kuchh naya naya tha ki lahore aa gaya

dil ko kahan hui thi mere aaKHiri shikast

main soch hi raha tha ki lahore aa gaya

teri gali ke dhyan mein manzil badal gai

Dallas ko ja raha tha ki lahore aa gaya

KHali saDak thi aur mere hathon mein us ka hath

ye ek saniha tha ki lahore aa gaya

'sayyad' utar rahi thi koi aur hi ghazal

kuchh aur likh raha tha ki lahore aa gaya