apne ham-rah jala rakkha hai

apne ham-rāh jalā rakkhā hai

tāq-e-dil par jo diyā rakkhā hai

jumbish-e-lab na sahī tere ḳhilāf

haath ko ham ne uThā rakkhā hai

tū mujhe chhoḌ ke jā saktā nahīñ

chhoḌ is baat meñ kyā rakkhā hai

vo milā degā hameñ bhī jis ne

aab aur gil ko milā rakkhā hai

mujh ko mālūm hai merī ḳhātir

kahīñ ik jaal bunā rakkhā hai

jāntā huuñ mire qissa-go ne

asl qisse ko chhupā rakkhā hai

āsmānoñ ne gavāhī ke liye

ik sitāre ko bachā rakkhā hai

kaam kuchh itne haiñ karne ko 'jamāl'

naam ko kal pe uThā rakkhā hai

apne ham-rah jala rakkha hai

taq-e-dil par jo diya rakkha hai

jumbish-e-lab na sahi tere KHilaf

hath ko hum ne uTha rakkha hai

tu mujhe chhoD ke ja sakta nahin

chhoD is baat mein kya rakkha hai

wo mila dega hamein bhi jis ne

aab aur gil ko mila rakkha hai

mujh ko malum hai meri KHatir

kahin ek jal buna rakkha hai

jaanta hun mere qissa-go ne

asl qisse ko chhupa rakkha hai

aasmanon ne gawahi ke liye

ek sitare ko bacha rakkha hai

kaam kuchh itne hain karne ko 'jamal'

nam ko kal pe uTha rakkha hai