apni sab umr laga KHud ko kamate hue hum

apnī sab 'umr lagā ḳhud ko kamāte hue ham

aur lamhoñ meñ kamā.ī ko gañvāte hue ham

ḳhvāb thā apnā ki sab ham ko mayassar ho jaa.e

ab isī ranj meñ haiñ aañkh churāte hue ham

ik 'ajab niiñd ke 'ālam meñ guzartī huī 'umr

ḳhud ko āvāz pe āvāz lagāte hue ham

rokne se bhī to ruktā nahīñ dariyā-e-hayāt

so isī dhāre meñ ab ḳhud ko bahāte hue ham

ādmiyyat se bahut duur nikal aa.e haiñ

zindagī terī rivāyāt nibhāte hue ham

qabr aur shahr meñ kuchh farq nahīñ hai 'sānī'

bas yahī roz kahīñ sub.h ko jaate hue ham

apni sab 'umr laga KHud ko kamate hue hum

aur lamhon mein kamai ko ganwate hue hum

KHwab tha apna ki sab hum ko mayassar ho jae

ab isi ranj mein hain aankh churaate hue hum

ek 'ajab nind ke 'alam mein guzarti hui 'umr

KHud ko aawaz pe aawaz lagate hue hum

rokne se bhi to rukta nahin dariya-e-hayat

so isi dhaare mein ab KHud ko bahate hue hum

aadmiyyat se bahut dur nikal aae hain

zindagi teri riwayat nibhate hue hum

qabr aur shahr mein kuchh farq nahin hai 'sani'

bas yahi roz kahin subh ko jate hue hum