aql se hasil hui kya kya pashimani mujhe

aql se hāsil huī kyā kyā pashīmānī mujhe

ishq jab dene lagā tālīm-e-nādānī mujhe

ranj degī bāġh-e-rizvāñ kī tan-āsānī mujhe

yaad aa.egā tirā lutf-e-sitam-rānī mujhe

merī jānib hai muḳhātib ḳhaas kar vo chashm-e-nāz

ab to karnī hī paḌegī dil kī qurbānī mujhe

dekh le ab kahīñ aa kar jo vo ġhaflat-shi.ār

kis qadar ho jaa.e mar jaane meñ āsānī mujhe

be-naqāb aane ko haiñ maqtal meñ vo be-shak magar

dekhne kaahe ko degī merī hairānī mujhe

saiñkaḌoñ āzādiyāñ is qaid par 'hasrat' nisār

jis ke baa.is kahte haiñ sab un kā zindānī mujhe

aql se hasil hui kya kya pashimani mujhe

ishq jab dene laga talim-e-nadani mujhe

ranj degi bagh-e-rizwan ki tan-asani mujhe

yaad aaega tera lutf-e-sitam-rani mujhe

meri jaanib hai muKHatib KHas kar wo chashm-e-naz

ab to karni hi paDegi dil ki qurbani mujhe

dekh le ab kahin aa kar jo wo ghaflat-shiar

kis qadar ho jae mar jaane mein aasani mujhe

be-naqab aane ko hain maqtal mein wo be-shak magar

dekhne kahe ko degi meri hairani mujhe

sainkaDon aazadiyan is qaid par 'hasrat' nisar

jis ke bais kahte hain sab un ka zindani mujhe