ashk aankhon mein liye aaThon pahar dekhega kaun

ashk āñkhoñ meñ liye āThoñ pahar dekhegā kaun

ham nahīñ hoñge to terī rahguzar dekhegā kaun

sham.a bhī bujh jā.egī parvāna bhī jal jā.egā

raat ke donoñ musāfir haiñ shajar dekhegā kaun

sone aur chāñdī ke bartan kī numā.ish hai yahāñ

maiñ huuñ kūza-gar mirā dast-e-hunar dekhegā kaun

jis qadar Duubā huā huuñ ḳhud maiñ apne ḳhuun meñ

ḳhud ko apne ḳhuun meñ yuuñ tar-ba-tar dekhegā kaun

har taraf maqtal meñ hai chhā.ī huī vīrāniyāñ

neza-e-bātil pe āḳhir merā sar dekhegā kaun

mere zāhir par nigāheñ sab kī haiñ 'afzal' magar

mere andar jo chhupā hai vo guhar dekhegā kaun

ashk aankhon mein liye aaThon pahar dekhega kaun

hum nahin honge to teri rahguzar dekhega kaun

shama bhi bujh jaegi parwana bhi jal jaega

raat ke donon musafir hain shajar dekhega kaun

sone aur chandi ke bartan ki numaish hai yahan

main hun kuza-gar mera dast-e-hunar dekhega kaun

jis qadar Duba hua hun KHud main apne KHun mein

KHud ko apne KHun mein yun tar-ba-tar dekhega kaun

har taraf maqtal mein hai chhai hui viraniyan

neza-e-baatil pe aaKHir mera sar dekhega kaun

mere zahir par nigahen sab ki hain 'afzal' magar

mere andar jo chhupa hai wo guhar dekhega kaun