asir-e-panja-e-ahd-e-shabab kar ke mujhe

asīr-e-panja-e-ahd-e-shabāb kar ke mujhe

kahāñ gayā mirā bachpan ḳharāb kar ke mujhe

kisī ke dard-e-mohabbat ne umr-bhar ke liye

ḳhudā se maañg liyā intiḳhāb kar ke mujhe

ye un ke husn ko hai sūrat-āfrīñ se gila

ġhazab meñ Daal diyā lā-javāb kar ke mujhe

vo paas aane na paa.e ki aa.ī maut kī niiñd

nasīb so ga.e masrūf-e-ḳhvāb kar ke mujhe

mire gunāh ziyāda haiñ yā tirī rahmat

karīm tū hī batā de hisāb kar ke mujhe

maiñ un ke parda-e-be-jā se mar gayā 'muztar'

unhoñ ne maar hī Daalā hijāb kar ke mujhe

asir-e-panja-e-ahd-e-shabab kar ke mujhe

kahan gaya mera bachpan KHarab kar ke mujhe

kisi ke dard-e-mohabbat ne umr-bhar ke liye

KHuda se mang liya intiKHab kar ke mujhe

ye un ke husn ko hai surat-afrin se gila

ghazab mein Dal diya la-jawab kar ke mujhe

wo pas aane na pae ki aai maut ki nind

nasib so gae masruf-e-KHwab kar ke mujhe

mere gunah ziyaada hain ya teri rahmat

karim tu hi bata de hisab kar ke mujhe

main un ke parda-e-be-ja se mar gaya 'muztar'

unhon ne mar hi Dala hijab kar ke mujhe