aur kuchh yaad nahin ab se na tab se puchho

aur kuchh yaad nahīñ ab se na tab se pūchho

merī āñkhoñ se lahū bahtā hai kab se pūchho

lamhe lamhe meñ huā jaatā huuñ reza reza

vaj.h kuchh mujh se na pūchho mire rab se pūchho

vo to sūraj hai har ik baat kā sho.ala hai javāb

rū-ba-rū aa ke kaho yā ki aqab se pūchho

yaad hai qissa-e-ġham kā mujhe har lafz abhī

haal jis dard kā jis rañj kā jab se pūchho

tai havā kaise añdheroñ ke samundar kā safar

ġhāza-e-sub.h se kyā chādar-e-shab se pūchho

zaḳhm dekho mire talvoñ ke na chehre kā ġhubār

mujh pe kyā guzrī hai ye rāh-e-talab se pūchho

kitne sahrā ki simaT aa.e haiñ siine meñ mire

tishnagī merī na sūkhe hue lab se pūchho

yuuñ na har chehre pe ab Daalo savālī nazreñ

us ke kūche kā pata tum to na sab se pūchho

mujh se kyā pūchhte ho saare hī lamhoñ kā hisāb

mil ke jis moḌ se ham bichhḌe haiñ tab se pūchho

harf-e-haq kahne meñ kyā kyā na hue ham pe sitam

pūchhnā hī hai to bū-jahl o lahb se pūchho

jumbish-e-lab kī tumheñ bhī hai ijāzat 'anjum'

baat jo pūchho bahar-hāl adab se pūchho

aur kuchh yaad nahin ab se na tab se puchho

meri aankhon se lahu bahta hai kab se puchho

lamhe lamhe mein hua jata hun reza reza

wajh kuchh mujh se na puchho mere rab se puchho

wo to suraj hai har ek baat ka shoala hai jawab

ru-ba-ru aa ke kaho ya ki aqab se puchho

yaad hai qissa-e-gham ka mujhe har lafz abhi

haal jis dard ka jis ranj ka jab se puchho

tai hawa kaise andheron ke samundar ka safar

ghaza-e-subh se kya chadar-e-shab se puchho

zaKHm dekho mere talwon ke na chehre ka ghubar

mujh pe kya guzri hai ye rah-e-talab se puchho

kitne sahra ki simaT aae hain sine mein mere

tishnagi meri na sukhe hue lab se puchho

yun na har chehre pe ab Dalo sawali nazren

us ke kuche ka pata tum to na sab se puchho

mujh se kya puchhte ho sare hi lamhon ka hisab

mil ke jis moD se hum bichhDe hain tab se puchho

harf-e-haq kahne mein kya kya na hue hum pe sitam

puchhna hi hai to bu-jahl o lahb se puchho

jumbish-e-lab ki tumhein bhi hai ijazat 'anjum'

baat jo puchho bahar-haal adab se puchho