aur to pas mere hijr mein kya rakkha hai

aur to paas mire hijr meñ kyā rakkhā hai

ik tire dard ko pahlū meñ chhupā rakkhā hai

dil se arbāb-e-vafā kā hai bhulānā mushkil

ham ne ye un ke taġhāful ko sunā rakkhā hai

tum ne baal apne jo phūloñ meñ basā rakkhe haiñ

shauq ko aur bhī dīvāna banā rakkhā hai

saḳht bedard hai tāsīr-e-mohabbat ki unheñ

bistar-e-nāz pe sote se jagā rakkhā hai

aah vo yaad ki us yaad ko ho kar majbūr

dil-e-māyūs ne muddat se bhulā rakkhā hai

kyā ta.ammul hai mire qatl meñ ai bāzū-e-yār

ek hī vaar meñ sar tan se judā rakkhā hai

husn ko jaur se begāna na samjho ki use

ye sabaq ishq ne pahle hī paḌhā rakkhā hai

terī nisbat se sitamgar tire māyūsoñ ne

dāġh-e-hirmāñ ko bhī siine se lagā rakkhā hai

kahte haiñ ahl-e-jahāñ dard-e-mohabbat jis ko

naam usī kā dil-e-muztar ne davā rakkhā hai

nigah-e-yār se paikān-e-qazā kā mushtāq

dil-e-majbūr nishāne pe khulā rakkhā hai

is kā anjām bhī kuchh soch liyā hai 'hasrat'

tū ne rabt un se jo is darja baḌhā rakkhā hai

aur to pas mere hijr mein kya rakkha hai

ek tere dard ko pahlu mein chhupa rakkha hai

dil se arbab-e-wafa ka hai bhulana mushkil

hum ne ye un ke taghaful ko suna rakkha hai

tum ne baal apne jo phulon mein basa rakkhe hain

shauq ko aur bhi diwana bana rakkha hai

saKHt bedard hai tasir-e-mohabbat ki unhen

bistar-e-naz pe sote se jaga rakkha hai

aah wo yaad ki us yaad ko ho kar majbur

dil-e-mayus ne muddat se bhula rakkha hai

kya tammul hai mere qatl mein ai bazu-e-yar

ek hi war mein sar tan se juda rakkha hai

husn ko jaur se begana na samjho ki use

ye sabaq ishq ne pahle hi paDha rakkha hai

teri nisbat se sitamgar tere mayuson ne

dagh-e-hirman ko bhi sine se laga rakkha hai

kahte hain ahl-e-jahan dard-e-mohabbat jis ko

nam usi ka dil-e-muztar ne dawa rakkha hai

nigah-e-yar se paikan-e-qaza ka mushtaq

dil-e-majbur nishane pe khula rakkha hai

is ka anjam bhi kuchh soch liya hai 'hasrat'

tu ne rabt un se jo is darja baDha rakkha hai