agar bazm-e-hasti mein aurat na hoti

agar bazm-e-hastī meñ aurat na hotī

ḳhayāloñ kī rañgīn jannat na hotī

sitāroñ ke dilkash fasāne na hote

bahāroñ kī nāzuk haqīqat na hotī

jabīnoñ pe nūr-e-masarrat na khiltā

nigāhoñ meñ shān-e-muravvat na hotī

ghaTāoñ kī aamad ko sāvan taraste

fazāoñ meñ bahkī baġhāvat na hotī

faqīroñ ko irfān-e-hastī na miltā

atā zāhidoñ ko ibādat na hotī

musāfir sadā manziloñ par bhaTakte

safīnoñ ko sāhil kī qurbat na hotī

har ik phuul kā rang phīkā sā rahtā

nasīm-e-bahārāñ meñ nik.hat na hotī

ḳhudā.ī kā insāf ḳhāmosh rahtā

sunā hai kisī kī shafā.at na hotī

agar bazm-e-hasti mein aurat na hoti

KHayalon ki rangin jannat na hoti

sitaron ke dilkash fasane na hote

bahaaron ki nazuk haqiqat na hoti

jabinon pe nur-e-masarrat na khilta

nigahon mein shan-e-murawwat na hoti

ghaTaon ki aamad ko sawan taraste

fazaon mein bahki baghawat na hoti

faqiron ko irfan-e-hasti na milta

ata zahidon ko ibaadat na hoti

musafir sada manzilon par bhaTakte

safinon ko sahil ki qurbat na hoti

har ek phul ka rang phika sa rahta

nasim-e-bahaaran mein nikhat na hoti

KHudai ka insaf KHamosh rahta

suna hai kisi ki shafaat na hoti