ba-juz saya tan-e-laghar ko mere koi kya samjhe

ba-juz saaya tan-e-lāġhar ko mere koī kyā samjhe

mirī sūrat ko mahfil meñ vo naqsh-e-boriyā samjhe

ham us ko apne haq meñ āfat-e-jāñ aur balā samjhe

butān-e-be-vafā haiñ jin ko ik apnī adā samjhe

koī kyā ḳhaak rāz-e-mushkil-e-zāt-e-ḳhudā samjhe

agar nūr-e-ḳhudā ko zāt-e-insāñ se judā samjhe

vahāñ jā kar kare gar qatl tū bīmār-e-hijrāñ ko

tire kūche ko apne haq meñ vo dārushshifā samjhe

siyah-baḳhtī pe saaya gar ho terī zulf-e-shab-gūñ kā

use vo apne sar pe sāya-e-bāl-e-humā samjhe

vahī kartā hai insāñ kaam jo qismat karātī hai

koī chāhe use samjhe ravā yā nāravā samjhe

laTakte dekhā siine par jo tere tār-e-gesū ko

use dīvāne vahshat meñ tirā band-e-qabā samjhe

na hargiz ḳhuuñ rulā.e bulbuloñ ko baaġh meñ ai gul

jo apne husn ko tū tā.ir-e-rañg-e-hinā samjhe

tire ā.īna-e-ruḳh ko sikandar dekhne aayā

tirī mahfil meñ ham us ko gadā-e-be-navā samjhe

koī kyā jāntā hai kis qadar bose liye ham ne

samajhte haiñ ham us ko yā hamārā dil-rubā samjhe

butoñ se ham ne joḌā rishta-e-dil ko vo kāfir hai

agar is rishta ko koī hamāre nāravā samjhe

tū jā kar chheḌ gul ko yā kisī kī zulf-e-pechāñ ko

chal ai bād-e-sabā tū kyā mirī nāz-o-adā samjhe

kabhī baiThā bhī gar dekhā unhoñ ne apne kūche meñ

tan-e-lāġhar ko mere vo kisī kā naqsh-e-pā samjhe

bayābāñ meñ jo aayā koī jhoñkā bād-e-sar-sar kā

tirī ham sard-mehrī se nasīm-e-jāñ-fazā samjhe

vahī haiñ ham banāyā jo hameñ haq ne nahīñ parvā

koī ham ko burā samjhe koī ham ko bhalā samjhe

bhale ko gar burā samjhe na hargiz vo burā hogā

bhalā is meñ burā kyā hai bure ko gar burā samjhe

hai insāñ ke liye lāzim jahāñ meñ dekh kar chalnā

vo hai haivāñ na dil meñ jo zamāne kī havā samjhe

agar us ne kabhī toḌā hamāre gauhar-e-dil ko

ham us ke haq meñ us ke TūTne ko momiyā samjhe

pighal kar sham.a ḳhud parvāna ko pahle jalātī hai

kisī ke mom hone ko na koī momiyā samjhe

garebāñ ham ne dikhlāyā unhoñ ne zulf dikhlā.ī

hamārā samjhe vo matlab ham un kā mudda.ā samjhe

ḳhudā ko samjhe tum patthar jo patthar ko ḳhudā samjhe

agar samjhe use patthar to phir tum us ko kyā samjhe

tarīq-e-ḳhāksārī sullam-e-bām-e-buzurgī hai

usī ko 'mashriqī' insāñ jahāñ meñ kīmiyā samjhe

ba-juz saya tan-e-laghar ko mere koi kya samjhe

meri surat ko mahfil mein wo naqsh-e-boriya samjhe

hum us ko apne haq mein aafat-e-jaan aur bala samjhe

butan-e-be-wafa hain jin ko ek apni ada samjhe

koi kya KHak raaz-e-mushkil-e-zat-e-KHuda samjhe

agar nur-e-KHuda ko zat-e-insan se juda samjhe

wahan ja kar kare gar qatl tu bimar-e-hijran ko

tere kuche ko apne haq mein wo darushshifa samjhe

siyah-baKHti pe saya gar ho teri zulf-e-shab-gun ka

use wo apne sar pe saya-e-baal-e-huma samjhe

wahi karta hai insan kaam jo qismat karaati hai

koi chahe use samjhe rawa ya narawa samjhe

laTakte dekha sine par jo tere tar-e-gesu ko

use diwane wahshat mein tera band-e-qaba samjhe

na hargiz KHun rulae bulbulon ko bagh mein ai gul

jo apne husn ko tu tair-e-rang-e-hina samjhe

tere aaina-e-ruKH ko sikandar dekhne aaya

teri mahfil mein hum us ko gada-e-be-nawa samjhe

koi kya jaanta hai kis qadar bose liye hum ne

samajhte hain hum us ko ya hamara dil-ruba samjhe

buton se hum ne joDa rishta-e-dil ko wo kafir hai

agar is rishta ko koi hamare narawa samjhe

tu ja kar chheD gul ko ya kisi ki zulf-e-pechan ko

chal ai baad-e-saba tu kya meri naz-o-ada samjhe

kabhi baiTha bhi gar dekha unhon ne apne kuche mein

tan-e-laghar ko mere wo kisi ka naqsh-e-pa samjhe

bayaban mein jo aaya koi jhonka baad-e-sar-sar ka

teri hum sard-mehri se nasim-e-jaan-faza samjhe

wahi hain hum banaya jo hamein haq ne nahin parwa

koi hum ko bura samjhe koi hum ko bhala samjhe

bhale ko gar bura samjhe na hargiz wo bura hoga

bhala is mein bura kya hai bure ko gar bura samjhe

hai insan ke liye lazim jahan mein dekh kar chalna

wo hai haiwan na dil mein jo zamane ki hawa samjhe

agar us ne kabhi toDa hamare gauhar-e-dil ko

hum us ke haq mein us ke TuTne ko momiya samjhe

pighal kar shama KHud parwana ko pahle jalati hai

kisi ke mom hone ko na koi momiya samjhe

gareban hum ne dikhlaya unhon ne zulf dikhlai

hamara samjhe wo matlab hum un ka muddaa samjhe

KHuda ko samjhe tum patthar jo patthar ko KHuda samjhe

agar samjhe use patthar to phir tum us ko kya samjhe

tariq-e-KHaksari sullam-e-baam-e-buzurgi hai

usi ko 'mashriqi' insan jahan mein kimiya samjhe