ba-qadr-e-hausla koi kahin koi kahin tak hai

ba-qadr-e-hausla koī kahīñ koī kahīñ tak hai

safar meñ rāh-o-manzil kā ta.ayyun bhī yahīñ tak hai

na ho inkār to isbāt kā pahlū bhī kyuuñ nikle

mire isrār meñ tāqat faqat terī nahīñ tak hai

udhar vo baat ḳhushbū kī tarah uḌtī thī galiyoñ meñ

idhar maiñ ye samajhtā thā ki mere ham-nashīñ tak hai

nahīñ kotāh-dastī kā gila itnā ġhanīmat hai

pahuñch hāthoñ kī apne apne jeb-o-āstīñ tak hai

siyāhī dil kī phūTegī to phir nas nas se phūTegī

ġhulāmo ye na samjho dāġh-e-rusvā.ī jabīñ tak hai

phir aage marhale tai ho raheñge himmat-e-dil se

jahāñ tak raushnī hai ḳhauf-e-tārīkī vahīñ tak hai

ilāhī bārish-e-abr-e-karam ho fasl duunī ho

ki 'bāqar' kī to aamad bas isī dil kī zamīñ tak hai

ba-qadr-e-hausla koi kahin koi kahin tak hai

safar mein rah-o-manzil ka tayyun bhi yahin tak hai

na ho inkar to isbaat ka pahlu bhi kyun nikle

mere israr mein taqat faqat teri nahin tak hai

udhar wo baat KHushbu ki tarah uDti thi galiyon mein

idhar main ye samajhta tha ki mere ham-nashin tak hai

nahin kotah-dasti ka gila itna ghanimat hai

pahunch hathon ki apne apne jeb-o-astin tak hai

siyahi dil ki phuTegi to phir nas nas se phuTegi

ghulamo ye na samjho dagh-e-ruswai jabin tak hai

phir aage marhale tai ho rahenge himmat-e-dil se

jahan tak raushni hai KHauf-e-tariki wahin tak hai

ilahi barish-e-abr-e-karam ho fasl duni ho

ki 'baqar' ki to aamad bas isi dil ki zamin tak hai