baghban par zor chalta hai na kuchh sayyaad par

bāġhbāñ par zor chaltā hai na kuchh sayyād par

saḳhtiyāñ kartā huuñ maiñ apne dil-e-nāshād par

un kā ro denā mazār-e-kushta-e-bedād par

abr-e-naisāñ kī hai bārish gulshan-e-barbād par

vo bhī haiñ afsurda marg-e-āshiq-e-nāshād par

kahne vaalā kaun hai ab marhabā bedād par

kis giraftār-e-qafas kī āh-e-ātish-bār se

bijliyāñ girne lagī haiñ ḳhāna-e-sayyād par

un se kyā zikr-e-talātum-ḳhezī-e-dariyā-e-ishq

jo tule baiThe hoñ nāseh harche bādā-bād par

yā ḳhayāl-e-abrū-e-ḳhūbāñ se dil ko baaz rakh

yā rag-e-gardan ko rakh de ḳhanjar-e-faulād par

ishq-e-sādiq ko gavārā kyuuñ huā kyūñ-kar huā

hīla-e-parvez ġhālib taisha-e-farhād par

ba.ad murdan ruuh tere ḳhānamāñ-barbād kī

hogī āvāra fazā-e-nik.hat-e-barbād par

halqa-e-dām-e-alā.eq band-e-mazhab qaid-e-nang

kis qadar pābandiyāñ haiñ fitrat-e-āzād par

is qadar baḌhte ga.e qisse ki daftar ho ga.e

hāshiye chaḌhte ga.e ai dil tirī rūdād par

nāla-kash ho gar tirā ġham-dīda-e-hijrāñ-nasīb

fitna-e-shor-e-qayāmat chauñk uThe fariyād par

is meñ ai me.amār-e-hastī maslahat thī kaun sī

aisā qasr-e-ḳhushnumā aur ret kī buniyād par

yaad jis kī dil kā mere haal kar detī hai ġhair

dil mujhe majbūr kartā hai usī kī yaad par

dafn hai hindostāñ kī is meñ tahzīb-e-qadīm

phuul barsā ai sabā ḳhāk-e-jahān-ābād par

dil hai be-zauq-e-ġhazal 'mahrūm' lekin chand sher

likh diye haiñ hazrat-e-'armān' ke irshād par

baghban par zor chalta hai na kuchh sayyaad par

saKHtiyan karta hun main apne dil-e-nashad par

un ka ro dena mazar-e-kushta-e-bedad par

abr-e-naisan ki hai barish gulshan-e-barbaad par

wo bhi hain afsurda marg-e-ashiq-e-nashad par

kahne wala kaun hai ab marhaba bedad par

kis giraftar-e-qafas ki aah-e-atish-bar se

bijliyan girne lagi hain KHana-e-sayyaad par

un se kya zikr-e-talatum-KHezi-e-dariya-e-ishq

jo tule baiThe hon naseh harche baada-baad par

ya KHayal-e-abru-e-KHuban se dil ko baz rakh

ya rag-e-gardan ko rakh de KHanjar-e-faulad par

ishq-e-sadiq ko gawara kyun hua kyun-kar hua

hila-e-parwez ghaalib taisha-e-farhad par

baad murdan ruh tere KHanaman-barbaad ki

hogi aawara faza-e-nikhat-e-barbaad par

halqa-e-dam-e-alaeq band-e-mazhab qaid-e-nang

kis qadar pabandiyan hain fitrat-e-azad par

is qadar baDhte gae qisse ki daftar ho gae

hashiye chaDhte gae ai dil teri rudad par

nala-kash ho gar tera gham-dida-e-hijran-nasib

fitna-e-shor-e-qayamat chaunk uThe fariyaad par

is mein ai meamar-e-hasti maslahat thi kaun si

aisa qasr-e-KHushnuma aur ret ki buniyaad par

yaad jis ki dil ka mere haal kar deti hai ghair

dil mujhe majbur karta hai usi ki yaad par

dafn hai hindostan ki is mein tahzib-e-qadim

phul barsa ai saba KHak-e-jahan-abaad par

dil hai be-zauq-e-ghazal 'mahrum' lekin chand sher

likh diye hain hazrat-e-'arman' ke irshad par