bahar kabhi andar ki koi baat nahin ki

bāhar kabhī andar kī koī baat nahīñ kī

darvāze se bhī ghar kī koī baat nahīñ kī

malhūz rakhā maiñ ne un āñkhoñ kī namī ko

sahrā meñ samundar kī koī baat nahīñ kī

haarā to vo rotā rahā taqdīr kā ronā

jiitā to muqaddar kī koī baat nahīñ kī

us aañkh ne patjhaḌ kā koī zikr na chheḌā

dil ne bhī gul-e-tar kī koī baat nahīñ kī

ghar meñ bhī rahā ghar ke masā.il se gurezāñ

daftar meñ bhī daftar kī koī baat nahīñ kī

ḳhvāboñ kī kahānī ne mirī niiñd uḌā dī

phir takiya-o-chādar kī koī baat nahīñ kī

ab ishq meñ kuchh kaam nahīñ nāma-baroñ kā

so maiñ ne kabūtar kī koī baat nahīñ kī

bahar kabhi andar ki koi baat nahin ki

darwaze se bhi ghar ki koi baat nahin ki

malhuz rakha main ne un aankhon ki nami ko

sahra mein samundar ki koi baat nahin ki

haara to wo rota raha taqdir ka rona

jita to muqaddar ki koi baat nahin ki

us aankh ne patjhaD ka koi zikr na chheDa

dil ne bhi gul-e-tar ki koi baat nahin ki

ghar mein bhi raha ghar ke masail se gurezan

daftar mein bhi daftar ki koi baat nahin ki

KHwabon ki kahani ne meri nind uDa di

phir takiya-o-chadar ki koi baat nahin ki

ab ishq mein kuchh kaam nahin nama-baron ka

so main ne kabutar ki koi baat nahin ki