bani-e-jaur-o-jafa hain sitam-ijad hain sab

bāni-e-jaur-o-jafā haiñ sitam-ījād haiñ sab

rāhat-e-jāñ koī dilbar nahīñ jallād haiñ sab

kabhī tuubā tire qāmat se na hogā baalā

bāteñ kahne kī ye ai ġhairat-e-shamshād haiñ sab

mizha o abrū o chashm o nigah o ġhamza o naaz

haq jo pūchho to mirī jaan ke jallād haiñ sab

sarv ko dekh ke kahtā hai dil-e-basta-e-zulf

ham giraftār haiñ is baaġh meñ āzād haiñ sab

kuchh hai behūda o nāqis to 'amānat' kā kalām

yuuñ to kahne ko fan-e-sher meñ ustād haiñ sab

bani-e-jaur-o-jafa hain sitam-ijad hain sab

rahat-e-jaan koi dilbar nahin jallad hain sab

kabhi tuba tere qamat se na hoga baala

baaten kahne ki ye ai ghairat-e-shamshad hain sab

mizha o abru o chashm o nigah o ghamza o naz

haq jo puchho to meri jaan ke jallad hain sab

sarw ko dekh ke kahta hai dil-e-basta-e-zulf

hum giraftar hain is bagh mein aazad hain sab

kuchh hai behuda o naqis to 'amanat' ka kalam

yun to kahne ko fan-e-sher mein ustad hain sab