baat suraj ki koi aaj bani hai ki nahin

baat sūraj kī koī aaj banī hai ki nahīñ

vo jo ik raat musalsal thī kaTī hai ki nahīñ

tere hāthoñ meñ to ā.īna vahī hai ki jo thā

sochtā huuñ mirā chehra bhī vahī hai ki nahīñ

mujh ko Takrā ke ba-har-hāl bikharnā thā magar

vo jo dīvār sī haa.il thī girī hai ki nahīñ

us kā chehra hai ki mahtāb vo āñkheñ haiñ ki jhiil

baat us baat se aage bhī chalī hai ki nahīñ

apne pahlū meñ humakte hue saa.e na sajā

kyā ḳhabar un se ye milne kī ghaḌī hai ki nahīñ

habs chehroñ pe to sadiyoñ se musallat hai magar

koī āñdhī bhī kisī dil meñ uThī hai ki nahīñ

pūchhtā phirtā huuñ maiñ bhāgtī kirnoñ se 'rashīd'

us bhare shahr meñ apnā bhī koī hai ki nahīñ

baat suraj ki koi aaj bani hai ki nahin

wo jo ek raat musalsal thi kaTi hai ki nahin

tere hathon mein to aaina wahi hai ki jo tha

sochta hun mera chehra bhi wahi hai ki nahin

mujh ko Takra ke ba-har-haal bikharna tha magar

wo jo diwar si hail thi giri hai ki nahin

us ka chehra hai ki mahtab wo aankhen hain ki jhil

baat us baat se aage bhi chali hai ki nahin

apne pahlu mein humakte hue sae na saja

kya KHabar un se ye milne ki ghaDi hai ki nahin

habs chehron pe to sadiyon se musallat hai magar

koi aandhi bhi kisi dil mein uThi hai ki nahin

puchhta phirta hun main bhagti kirnon se 'rashid'

us bhare shahr mein apna bhi koi hai ki nahin